«Barselona» yarim himoyachisi Pedri Chempionlar ligasi doirasida «PSJ»ga qarshi bo‘lib o‘tadigan uchrashuv oldidan Usmon Dembelening o‘yini haqida fikr bildirdi.
«Usmon meni doim hayratda qoldirgan. U mashg‘ulotlarda oddiy futbolchi qila olmaydigan ishlarni bajarardi. Men unga har doim o‘ziga xos ekanini va ajoyib iqtidor sohibi bo‘lganini aytardim.
«PSJ»ga o‘tganidan keyin u o‘z salohiyatini to‘liq namoyon qildi va biz haqiqiy Dembeleni ko‘rdik. «Barselona»da ham u o‘z mahoratini ko‘rsatardi, ammo bu faqat ayrim o‘yin epizodlarida kuzatilardi. Unga barqarorlik yetishmasdi. O‘yinidagi izchillikni topgach, «Oltin to‘p»ni qo‘lga kirita oldi.
Men uchun u nafaqat jahon darajasidagi futbolchi, balki ajoyib do‘st hamdir. U bilan birga o‘ynash men uchun zavqli edi», — deya Pedrining so‘zlarini keltiradi Barca Universal nashri.
Qayd etish lozim, Usmon 2017–2023 yillarda «Barselona» sharafini himoya qilgan. Shundan so‘ng u «PSJ» safiga ko‘chib o‘tgan.
Eslatib o‘tamiz, parijliklar va kataloniyaliklar o‘rtasidagi bahs 20-oktyabrdan 21-oktyabrga o‘tar kechasi Toshkent vaqti bilan soat 00:00 da start oladi.
Muxlislar bu yangilikni Telegram’da muhokama qilmoqda
Izohlar Telegram’da ochiladi