Ниҳоят, ўша кун остонасидамиз. Ўзбекистон миллий жамоамизнинг жаҳон чемпионатидаги илк ўйинини интиқлик билан кутаётганимиз сари ўзига хос ёқимли ҳаяжон ҳар биримизда бўлиши табиий.
Албатта, жамоамиз мураккаб гуруҳдан жой олган ва дастлабки рақибимиз Жанубий Американинг етакчиларидан бири – Колумбия миллий жамоаси.
Бўлажак ўйин атрофидада янграётган фикр ва мулоҳазалар албатта биз учун қизиқ. Олис Колумбия томонларда Ўзбекистон миллий жамоамиз ҳақида ҳам жиддий қизиқиш билан қаралмоқда. Маҳаллий ОАВ вакиллари ҳам биз билан ўйинга катта эътибор қаратишяпти.
Конмебол томонидан ташкил этилган клуб ва миллий жамоалар ўйинларининг медиа ходими, шунингдек, маҳаллий «Индепендиенте Юмбо» клуби матбуот котиби, колумбиялик тажрибали журналист Мигел Вилламил Алварадо эртанги бўладиган муҳим учрашув олдидан Tribuna.uz журналистига қизиқарли интервю берди.
- Ўзбекистон – Колумбия ўртасидаги ўйин ҳам деярли яқинлашиб қолди. Бўлажак учрашув олдидан нималарни айта оласиз?
- Колумбия миллий жамоасининг жаҳон чемпионатидаги дебюти яқинлашиб келмоқда. Биз тўпнинг ҳаракатланишини интиқлик билан кутмоқдамиз ва жамоамизнинг ўйинига жуда оптимистик қараймиз. Ўзбекистоннинг бизга қарши ўйин режаси қандай бўлишини ва мураббий Фабио Каннаваро бизнинг кучли томонларимизга қарши қандай курашишини ва заиф томонларимиздан фойдаланишни режалаштираёганини кўришга қизиқамиз.
- Колумбия миллий жамоасининг жаҳон чемпионатидаги асосий мақсади нима?
- Колумбиянинг асосий мақсади – 2014 йилда Бразилияда бўлиб ўтган жаҳон чемпионатидаги натижаларига тенглашиш ёки ундан ҳам яхшироқ натижалар қайд этишдир. Ўшанда жамоа биринчи марта чорак финалга чиққанди. Бу Хамес Родригес ва бошқа колумбиялик футболчилар учун энг муҳим халқаро футбол турниридаги сўнгги иштирокини якунлашнинг ажойиб усули бўлади.
- Ўзбекистон миллий жамоаси ҳақида нималарни биласиз?
- Биз Ўзбекистон миллий жамоасини жаҳон футболи тарихидаги энг буюк афсоналардан бири Фабио Каннаваро бошқараётганини биламиз. Ўз услубига содиқ қолган ҳолда бу жамоа ҳимоя ва тактик интизомга кўп аҳамият беради ва ҳужумга тезкор ўтишлар билан жуда хавфли бўлиши мумкин.
- Биламизки, Колумбия ОАВда бизнинг миллий жамоамиз ҳақида мақолалар ёзишмоқда. Умуман, у ерда бизнинг жамоамизга қандай эътибор қаратилмоқда?
- Колумбиядаги оммавий ахборот воситалари Ўзбекистон миллий жамоасига катта эътибор қаратмоқда. Асосан, улар бизнинг жаҳон чемпионатидаги биринчи рақибимиз бўлиши сабаблидир. Биз ҳар бир жамоа учун турнирни яхши натижа билан бошлаш қанчалик муҳимлигини биламиз. Бу жамоанинг ўзига бўлган ишончи ҳамда руҳияти учун жуда муҳим бўлиши мумкин. Бундан ташқари, ушбу Осиё жамоаларининг стратегияси орқага чекиниб, қарши ҳужумда ўйнайдими ёки улар бизни бошқача ёндашув билан ҳайратда қолдирадими, деган савол катта қизиқиш уйғотмоқда.
- Ушбу учрашувдан олдин Колумбия ОАВда қизиқиш қанчалик юқори?
- Биринчи жаҳон чемпионати ўйини олдидан оммавий ахборот воситалари ва колумбиялик мухлисларнинг қизиқиши одатдагидек, жуда юқори. Футбол мамлакатимиздаги энг муҳим спорт тури. Шунинг учун сизга ишонтириб айтаманки, 50 миллион киши миллий жамоанинг дебютини томоша қилади ва биринчи учрашувда уч очкони қўлга киритишларига жуда умид билан қарайди.
- Табиийки, сиз ҳам Ўзбекистон миллий жамоаси ҳақида маълумотлар билан қизиққансиз. Айтинг-чи, бу масалада сизни нима ҳайрон қолдирди?
- Ўзбекистон миллий жамоасини ўрганиб чиққанимдан сўнг ҳужумчи ва барча даврларнинг энг яхши тўпурари Элдор Шомуродов ва дарвозабон Ўткир Юсупов каби тажрибали ўйинчилар, шунингдек, ўйинга тезлик ва шиддат бағишлайдиган ёш истеъдодлар мени ҳайратга солди. Бу барча позицияларда мувозанатли жамоа бўлиб, ҳар қандай рақибга қийинчилик туғдириши мумкин. Худди бир неча кун олдин Нидерландияга қарши ўйинда бўлгани каби.
- Мексикада ўтадиган Ўзбекистон – Колумбия ўйинида юртингиздан қанча мухлис келади, деб ўйлайсиз?
- Қўшма Штатлар ва Канададан ташқари Мексика Колумбия аҳолиси энг кўп бўлган 10 та давлатдан бири бўлиб, тахминан 250 000 аҳолига эга. Бу асосан қулай иш шароитлари, тил ва маданий ўхшашликлар туфайли. Шу сабабли «Estadio Ciudad de Mexico» стадионида бўлиб ўтадиган ўйинга 50 000 дан 60 000 гача колумбияликлар ташриф буюриши эҳтимоли жуда юқори.
- Шунингдек, жаҳон чемпионатида Колумбия миллий жамоасини ёритиш учун қанча журналист келган?
- Сизга аниқ рақамни айта олмайман. Лекин аминманки, илгари ҳеч қачон бунчалик колумбиялик журналистлар жаҳон чемпионатини ёритиш учун сафар қилмаган. Бизнинг ҳар бир мезбон мамлакатда матбуот вакилларимиз бор. Улар энг яхши жамоаларни, Жанубий Америка жамоаларини ҳамда албатта, миллий жамоамиз ўйнайдиган ҳар бир шаҳарни кузатиб боришади.
- Бизнинг гуруҳимиз ҳақида нима дейсиз? Уни кўпчилик «ўлим гуруҳи» деб таърифламоқда…
- Албатта, менимча, «К» гуруҳи «Ўлим гуруҳи» бўлиб, Португалия чемпионлик учун асосий даъвогарлардан бири. Колумбия 2024 йилги Америка Кубогида иккинчи ўринни эгаллаган ва турнирнинг энг яхши ўйинчилари бўлиши мумкин бўлган Конго билан Ўзбекистон миллий жамоалари. Ҳар бир жамоа 1\8 финалга йўлланмани қўлга кирита олмаган ва ҳар бир ўйин жуда қизиқарли бўлади.
