Венесуэлалик собиқ ҳужумчи Алехандро Моренонинг фикрига кўра, Аргентина миллий жамоаси етакчиси Лионел Месси жаҳон чемпионати гуруҳ босқичи 1-тури доирасидаги Жазоирга қарши ўйиннинг (3:0) биринчи бўлимидаёқ четлатилиши керак эди.
Биринчи бўлимда Месси жазоир миллий жамоаси ҳимоячиси Аисса Мандининг оёғи болдирини ортдан босиб олди ва рақиб майдонга йиқилди. Аммо бош ҳакам Шимон Марчиняк аргентиналикка сариқ карточка ҳам кўрсатмади, VAR ҳам вазиятга аралашмади.
«Бу Месси учун 100% қизил карточка эди. У кўрсатилиши керак эди. Шу вазият билан боғлиқ яна бир фикримни айтмоқчиман. Шундай фикр уйғонадики, кучли футболчиларга ўзгача муносабат бўлади. Жонли эфир вақтида томоша қилаётганингизда бу фолдек кўринади, такрорий лавҳани кўрсангиз – ҳа, бу қоида бузилиши ва уни ўрганиб чиқиш зарур. Нима учун Марчинякни такрорий лавҳани кўриш учун монитор олдига чақиришмади? Бу Лионел Месси учун қизил карточка кўрсатилиши керак бўлган эпизод эди. Мен Мессини қанчалик яхши кўрмай, бу қўпол ва нотўғри ҳаракат эди. Ортдан тўп учун курашмоқчи бўлиб бўлса-да, рақибнинг болдирини тиззасидан тўпиғигача босиб ўтганингиз учун футболчи четлатилиши керак», — дея Морено сўзларидан иқтибос келтирди ESPN FC.
