Германия миллий жамоасининг собиқ ҳужумчиси Мирослав Клозе Лионел Мессининг жаҳон чемпионатларидаги голлар сони бўйича унинг рекордига тенглашганига муносабат билдирди.
Эслатиб ўтамиз, Аргентина сардори ЖЧ-2026 гуруҳ босқичининг 1-турида Жазоир дарвозасига учта гол уриб, мундиаллардаги голлари сонини 16 тага етказди.
Шу тариқа, Месси узоқ йиллар давомида Клозега тегишли бўлган рекордни такрорлади.
«Мессининг голлар сони бўйича менга етиб олганидан ҳеч қандай эътирозим йўқ. Рекордлар янгиланиш учун яратилган. Ҳатто буни айнан Месси амалга оширганидан хурсанд бўлардим. Мен ҳар доим Мессининг катта мухлиси бўлганман. У ҳақиқий даҳо», — деди Клозе.
Айни пайтда мундиаллар тарихидаги энг яхши тўпурарлар рўйхатида Месси ва Клозе 16 тадан гол билан пешқадамлик қилмоқда.
Уларнинг ортидан бразилиялик афсона Роналдо 15 та гол билан жой олган. Кейинги поғоналарни эса Германия футболи афсонаси Герд Мюллер ҳамда Франция ҳужумчиси Килиан Мбаппе эгаллаб турибди. Ҳар икки футболчи ҳисобида 14 тадан гол мавжуд.
Месси кейинги учрашувларда гол урадиган бўлса, мундиаллар тарихидаги якка рекордчига айланиш имкониятига эга бўлади.
