8 карра «Олтин тўп» соҳиби Лионел Месси Испания қироли Филипп VI ва қиролича Летисия билан расмий кечки овқатда иштирок этади. Бу ҳақда Marca хабар берди.
Маълум қилинишича, Месси бугун, 22 октябр куни Испаниянинг Овиедо шаҳрига етиб боради. У ерда аргентиналик футболчи спорт йўналишидаги Астурия маликаси мукофотини қабул қилади. Шунингдек, Месси Овиедо спорт саройида мактаб ўқувчилари, талабалар ва мухлислар билан учрашади.
Шу куни кечқурун аргентиналик футболчи қироллик оиласи ҳамда мукофотнинг бошқа совриндорлари иштирокидаги расмий кечки овқатда қатнашади.
Эртага, 23 октябр куни эса Астурия маликаси мукофотини топшириш маросими бўлиб ўтади. Тантанали тадбир Кампоамор театрида ўтказилади.
Маросимдан сўнг «Интер Майами» ҳужумчиси АҚШга тўғридан-тўғри парвоз қилиб, MLS доирасида «Ню-Йорк Ред Буллз»га қарши учрашувда иштирок этиши кутилмоқда. Маълумот ўрнида, 39 ёшли футболчи чемпионатнинг ушбу мавсумида 27 та ўйинда майдонга тушиб, 25 та гол урди ва 12 та ассист амалга оширди.
