«Барселона» ва «Бавария»нинг собиқ ҳужумчиси, айни пайтда «Чикаго Файр» сафида тўп тепаётган Роберт Левандовски «Олтин тўп» учун асосий даъвогарлар ҳақида ўз фикрларини билдирди.
«Албатта, мен Ямалнинг «Олтин тўп»ни қўлга киритиши тарафдориман. У ажойиб футболчи, айниқса, ёшини ҳисобга олсак. Шунингдек, Ҳарри Кейн «Бавария»га фаолиятининг энг гуллаган даврида келди. Унинг майдонда кўрсатаётган ўйини ҳайратланарли. У қанчадан-қанча голлар урмоқда! Айниқса, мен жамоадан кетганимдан кейин «Бавария»га айнан шундай ҳужумчи етишмаётганди. Кейн билан жамоа ҳақиқатан ҳам жуда яхши ўйнамоқда.
Олисе ҳақида эса фақат бир нарсани айтишим мумкин: «Вау!» У учрашув тақдирини ўзгартиришга қодир футболчи. Менимча, Кейн, Олисе ва Диаснинг ўзаро ҳамкорлиги — идеал уйғунлик.
Ўтган мавсумдаги ўйинларига қарасак, «Бавария»га етишмаган ягона нарса Чемпионлар лигаси кубоги бўлди. Агар улар ўтган йили Чемпионлар лигасида ғолиб чиқишганида, бу 2020 йилда биз барча совринларни қўлга киритган мавсумимиз каби баҳоланган бўларди. Чунки улар ажойиб футбол намойиш этишди.
Сўнгги бир-икки йилда Бундеслига мен ўйнаган даврга нисбатан бироз ўзгарди. Масалан, «Бавария»нинг «Лейпциг»ни 6:1 ҳисобида мағлуб этганини олайлик. Балки чемпионат учун бундай натижа энг мақбул ҳолат эмасдир. Аммо «Бавария»нинг ривожланиши ҳақиқатан ҳам ҳайратланарли. Уларнинг ўйинидан ўрганиш мумкин бўлган жиҳатлар кўп, бошқа жамоалар ҳам улардан намуна олишга ҳаракат қилиши мумкин.
Олисенинг келажаги порлоқ. Биламан, ҳамма Ламин ҳақида гапирмоқда. Аммо мен баъзан бошқа футболчиларга ҳам эътибор беришга, ҳали ҳамма ҳам пайқамаган жиҳатларни кўришга ҳаракат қиламан.
Менимча, агар Олисе жаҳон чемпионатида бир-иккита гол урса, у ҳам Ламин ёки Кейн каби «Олтин тўп»нинг асосий даъвогарларидан бирига айланади.
Унинг қарорлари мукаммал: у вазиятни ҳис қилади, қачон дарвозага зарба бериш кераклигини, қачон пас узатиш ва қандай пас бериш лозимлигини яхши билади. Ламиннинг ўйинини томоша қилиш менга жуда ёқади. Олисенинг ҳаракатларини кузатиш ҳам бирдек завқли. Уларнинг майдондаги ўйинини томоша қилишни яхши кўраман», — дея Левандовскининг сўзларини The Athletic нашри келтирмоқда.
