Аргентина миллий жамоаси ҳужумчиси Лионел Месси жаҳон чемпионатлари тарихидаги яна бир рекордни ўз номига ёздириб қўйди.
38 ёшли футболчи ЖЧ-2026 гуруҳ босқичининг 1-турида Жазоир дарвозасига ҳет-трик қайд этиб, мундиалларда гол урган миллий жамоалар сонини 11 тага етказди.
Шу тариқа, Месси жаҳон чемпионатлари тарихида энг кўп турли рақиблар дарвозасини ишғол қилган футболчига айланди.
Аввалги рекорд 10 та жамоага гол урган Криштиану Роналду, Юрген Клинсманн ва Мирослав Клозега тегишли эди.
Месси олтита жаҳон чемпионатидаги иштироки давомида Сербия ва Черногория, Босния ва Герцеговина, Эрон, Нигерия, Австралия, Мексика, Саудия Арабистони, Хорватия, Франция, Нидерландия ҳамда Жазоир жамоалари дарвозасини ишғол қилган.
Эслатиб ўтамиз, Жазоирга қарши ҳет-трикдан сўнг аргентиналик афсона мундиаллардаги голлари сонини 16 тага етказди ва Германиянинг собиқ ҳужумчиси Мирослав Клозенинг рекордини такрорлади.
Месси навбатдаги голини урадиган бўлса, жаҳон чемпионатлари тарихининг якка энг яхши тўпурарига айланади.
