Ўзбекистон миллий жамоаси ҳимоячиси Рустам Ашурматов журналистлар билан суҳбатда Португалия ҳамда унинг юлдуз ҳужумчиси Криштиану Роналду ҳақида ўз фикрларини билдирди.
«Менимча, Португалия ҳозир Криштианусиз кучлироқ. Унинг асосий таркибда тушишини хоҳлайманми? Мен учун фарқи йўқ. Биз ҳар икки вариантга ҳам тайёрланамиз ва қўлимиздан келган барча ишни қилишга ҳаракат қиламиз», — деди Ашурматов.
Эслатиб ўтамиз, Ўзбекистон миллий жамоаси ЖЧ-2026 гуруҳ босқичида Колумбия, Португалия ва Конго ДР жамоаларига қарши баҳс олиб боради.
Миллий жамоа мундиалдаги тарихий илк учрашувини 18 июн куни Колумбияга қарши ўтказади.
Португалия билан баҳс эса гуруҳ босқичининг энг кутилаётган учрашувларидан бири бўлиб турибди. Унда Криштиану Роналду иштирок этадими ёки йўқ, бундан қатъи назар, Ўзбекистон миллий жамоаси барча сценарийларга тайёр эканини Ашурматов алоҳида таъкидлади.
