Ўзбекистон миллий жамоаси футболчиси Аббосбек Файзуллаев ЖЧ-2026 гуруҳ босқичининг 1-турида энг юқори тезлик қайд этган футболчи бўлди.
SofaScore маълумотларига кўра, 22 ёшли яримҳимоячи Колумбияга қарши учрашув давомида соатига 36 километр тезликка эришган. Бу эса биринчи турда майдонга тушган барча футболчилар орасидаги энг яхши натижа бўлди.
Энг тезкор футболчилар рейтингида ундан кейинги ўринларни Хорватия миллий жамоаси ҳимоячиси Йосип Станишич (35,9 км/соат) ва Кот-д'Ивуар вакили Вилфрид Синго (35,8 км/соат) эгаллади.
Бундан ташқари, Файзуллаев мундиал тарихида яна бир рекорд муаллифига айланган эди. У Колумбия дарвозасига киритган гол орқали Ўзбекистон миллий жамоасининг жаҳон чемпионатларидаги илк голини урган футболчи сифатида тарихга кирди.
Эслатиб ўтамиз, шунингдек, Оptа маълумотига кўра, бўйи 167 сантиметр бўлган Файзуллаев ХХI аср жаҳон чемпионатларида бош билан гол урган энг паст бўйли футболчига айланди.
Аввалги рекорд Уругвай миллий жамоаси футболчиси Жоржиан де Арраскаэтага тегишли эди. Бўйи 173 сантиметр бўлган футболчи ЖЧ-2022да Гана дарвозасига бош билан гол урганди.
Шу тариқа, Аббосбек Файзуллаев мундиалдаги дебют ўйинидаёқ Ўзбекистон футболи ва жаҳон чемпионати тарихидан жой оладиган иккита муҳим рекордни ўрнатди.
