Ўзбекистон миллий жамоаси бош мураббийи Фабио Каннаваро жаҳон чемпионати гуруҳ босқич 1-тур доирасидаги Колумбияга қарши баҳс (1:3)дан сўнг ЎФА матбуот хизматига интервю берди.
«Мураббий сифатида жуда кўп нарсага эътибор қаратишингиз, кўплаб масалаларни назорат қилишингиз ва тайёргарлик кўришингиз керак бўлади. Албатта, ҳаяжон ва бахт ҳисси бор, аммо охир-оқибат бутун эътиборингиз жамоага қаратилади ва атрофдаги кўп нарсаларни сезмай қолишингиз мумкин.
Футболчи сифатида эса турнирдан кўпроқ завқ олиш имконияти бўлади. Мураббийнинг футболчидан фарқи шундаки, мураббий сифатида жуда кўп азият чекасиз, чунки майдон ташқарисида турасиз.
Футболчиларга ёрдам бермоқчисиз, ҳамма нарсани назорат қилмоқчисиз, лекин буни тўлиқ уддалай олмайсиз. Баъзи ўзгаришлар қилишингиз мумкин холос. Шу сабаб мураббий кўпроқ ташвиш ва босимни ҳис қилади.
Колумбияга қарши учрашувдан кейинги энг катта сабоқ шуки, бу даражадаги хатолар жуда қимматга тушишини англадик. Биз ажойиб ўйин ўтказдик, жамоавий ҳаракат қилдик, агрессив ва интизомли бўлдик. Лекин бир лаҳза диққатни йўқотсангиз ёки рақибни назоратсиз қолдирсангиз, жазоланишингиз аниқ.
Биринчи гол бўлган вазиятларни узоқ вақт тайёрлагандик, аммо барибир хато қилдик. Иккинчи гол эса аутдан кейин юз берди.
Мен футболчиларга марказ орқали ўйнамаслик кераклигини айтгандим, чунки бу жуда ҳам хавфли ҳудуд. Шунинг учун бу даражада хатолар сонини камайтириш жуда муҳим. Шу билан бирга, иккинчи бўлимдаги ўйинимиздан жуда мамнун бўлдим.
Мен доим футболчиларга: «Тўп бизда бўлса, ўз услубимизни кўрсатишимиз керак. Футболдан қўрқмаслик, ўзимизга ишониш ва ўйин завқини ҳис қилишимиз керак», деб айтаман. Иккинчи бўлимда жамоа айнан шуни кўрсатди.
Улар ўйинни назорат қилишга уринишди, гол уришга ва яна бир қанча вазиятларга эга бўлишди. Афсуски, учинчи голни ҳам ўтказиб юбордик ва бу биз учун жуда ҳам оғир бўлди», — деди Каннаваро.
