Эрон миллий жамоаси бош мураббийи Амир Ғаленойи жаҳон чемпионати гуруҳ босқич 2-тур доирасидаги Белгияга қарши баҳс (0:0)дан сўнг ўз фикрларини билдириб ўтди.
«Ўйин жуда қизиқарли кечди. Ғалаба ҳар икки жамоага ҳам насиб этиши мумкин эди. Барча футболчиларга миннатдорчилик билдираман, айниқса Алиризо Бейранвандга.
Мени хафа қилган ягона жиҳат — ўзгаришларимиз иш бермади. Биз улар ўйинга ҳужумда тезлик қўшади деб ўйлаган эдик, аммо бу амалга ошмади.
Ҳатто Белгия 10 киши бўлиб қолганида ҳам мағлуб бўлмаганимизга омад деб қараш мумкин. Қилган ўзгаришларимдан қониқиш ҳосил қилмадим.
Футбол шундай. Баъзан алмаштиришлар иш беради, ўтган ўйинда бўлгани каби. Баъзан эса — йўқ. Бугун майдонга тушганлар кутилган натижани бермади.
Биз ҳар бир таймдаги дастлабки 15 дақиқада рақиб ҳужумини тўхтатишни мақсад қилгандик. Белгия — жуда кучли жамоа, сифатли футболчилари кўп.
Умуман олганда, буни бажардик. Лекин бизда иккита жуда яхши имконият бўлди, аммо уларни Куртуа қайтарди.
Шунингдек, гол урдик, аммо ўтган ўйиндаги каби бу сафар ҳам офсайд сабаб бекор қилинди. Торемий тахминан 20 сантиметрга офсайдда эди.
Барча йигитларга раҳмат айтаман. Биз турнирга оғир шароитда кириб келдик, бошиданоқ ҳаммаси осон кечмади. Бугунги ўйин ҳам қийин кечди.
Футболчилар тўлиқ фидойилик билан ҳаракат қилди, аммо яна таъкидлайман — ўзгаришлар иш бермади», — деди Ғаленойи.
