Ўзбекистон миллий жамоаси бош мураббийи Фабио Каннаваро жаҳон чемпионати гуруҳ босқич 2-тур доирасидаги Португалия қарши баҳс олдидан ЎФА матбуот хизматига интервю берди.
«Мен футболчиларимдаги босимни камайтиришга ҳаракат қиламан, чунки биз жаҳон чемпионатининг энг кучли жамоаларидан бирига қарши ўйнаймиз. Португалия таркиби юлдузли футболчиларга тўла ва албатта, уларда Криштиану Роналду бор. Сўнгги 20 йил ичида у Лионел Месси билан бир қаторда дунёнинг энг буюк футболчиларидан бири бўлиб келмоқда.
Португалия тўпни назорат қилишни яхши кўради, рақибга босим қилиш имконини бермайди. Улар қисқа паслар орқали ўйинни бошқаради ва ҳар бир вазиятда хавфли.
Шунинг учун биз ҳимояда жуда тартибли бўлишимиз керак. Шу билан бирга, тўп бизда бўлганда, уларга муаммо туғдиришга ҳаракат қилишимиз лозим.
Ҳар бир жамоанинг кучли ва заиф томонлари бўлади. Биз уларнинг кучли жиҳатларини имкон қадар чеклаб, заиф томонларидан фойдаланишга интилишимиз керак. Ҳа, албатта, Роналду — буюк футболчи ва катта юлдуз, аммо ўйин бошлангандан кейин буларнинг барчасини унутиш керак. Биз ўз вазифамизга эътибор қаратишимиз шарт.
Майдондан ташқарида футболчилар ўртасидаги муносабатлар жуда яхши бўлиши мумкин, аммо майдонда сиз дўст эмассиз. У ерда фақат ўз жамоангиз манфаатини ўйлашингиз керак бўлади.
Умуман олганда, Ўзбекистоннинг жаҳон чемпионатида илк бор қатнашаётган, лекин кучли жамоалардан қўрқмайдиган жамоа сифатида эслаб қолишларини истайман. Биз яхши футбол кўрсатадиган, яхши шаклланган ва интизомли жамоа сифатида танилишимиз керак. Шунингдек, биз ҳамма рақибларни ҳурмат қиламиз ва ўзимизга ҳам ҳурмат билан муносабатда бўлишларини истаймиз.
Болалигимдаги орзум футболчи бўлиш эди, мураббий эмас. Кейинчалик мураббийлик ҳақида ўйлай бошладим. Ҳаттоки аввалроқ спорт директори ёки жамоа менежери бўлишни хоҳлагандим, чунки мураббийлик жуда қийин ишдек туюларди. Аммо ҳозир ростини айтсам, бу ишни жуда яхши кўраман.
Ҳар куни эрталаб уйғонганимда янги нарсаларни ўрганишга, ўйинларни томоша қилишга ва тажрибамни футболчилар билан бўлишишга ҳаракат қиламан. Шу мени бахтли қилади. Футболчиларга нимадир бера олиш ҳисси мен учун жуда ҳам қадрли», — деди Каннаваро.
