Уэлс миллий жамоасининг собиқ вингери Гарет Бейл 2022 йилда футболчилик фаолиятини якунлаганидан кейинги ҳаёти ҳақида фикр билдирди.
«Футболни соғиндимми? Йўқ, унчалик эмас. Мен ҳар доим ҳамма нарсанинг бошланиши ва охири бўлишини билардим ва фаолиятим якунига тайёрланиб келганман. Шунчаки ўйнаш учун ўйнашни истамагандим.
Бу даражага етиш учун жуда кўп нарсалардан ўтасиз. Мен тўққиз ёшимдан буён профессионал футбол билан шуғулланганман ва бу, айниқса босим туфайли, инсонга таъсир қилади.
Бир қадам ортга ташлаб, ўзимни қайта тиклаш ёқимли бўлди.
Ҳозир яна футболни кўпроқ томоша қиляпман. Ўғлим Аксел «Реал» ва «Тоттенҳем» мухлиси. У билан бирга футбол томоша қилиш ва ўйиндан завқланиш ёқимли. Фаолият якунида чарчоқ туфайли пайдо бўлиши мумкин бўлган салбий ҳиссиётлар менда йўқ», — дея Бейлнинг сўзларини келтирди Sports нашри.
Маълумот учун, Гарет Бейл фаолияти давомида «Саутҳэмптон», «Тоттенҳэм», «Реал» ва «Лос-Анжелес» сафида ўйнаган. У Уелс миллий жамоаси тарихидаги энг машҳур футболчилардан бири ҳисобланади.
