Nihoyat, oʻsha kun ostonasida turibmiz. Oʻzbekiston milliy jamoamizning jahon chempionatidagi ilk oʻyinini intiqib kutayotganimiz sari oʻzigaxos yoqimli hayajon har birimizda boʻlishi tabiiy.
Albatta, jamoamiz murakkab guruhdan joy olgan va dastlabki raqibimiz Janubiy Amerikaning yetakchilaridan biri – Kolumbiya milliy jamoasi.
Boʻlajak oʻyin atrofidagi yangrayotgan fikr va mulohazalar albatta biz uchun qiziq. Olis Kolumbiya tomonlarda Oʻzbekiston milliy jamoamiz haqida ham jiddiy qiziqish bilan qaralmoqda. Mahalliy OAV vakillari ham biz bilan oʻyinga katta eʼtibor qaratishyapti.
Konmebol tomonidan tashkil etilgan klub va milliy jamoalar oʻyinlarining media xodimi, shuningdek, mahalliy «Independente Yumbo» klubi matbuot kotibi, kolumbiyalik tajribali jurnalist Migel Villamil Alvarado ertangi boʻladigan muhim uchrashuv oldidan Tribuna.uz jurnalistiga qiziqarli intervyu berdi.
- Oʻzbekiston – Kolumbiya oʻrtasidagi oʻyin ham deyarli yaqinlashib qoldi. Boʻlajak uchrashuv oldidan nimalarni ayta olasiz?
- Kolumbiya milliy jamoasining jahon chempionatidagi debyuti yaqinlashib kelmoqda. Biz toʻpning harakatlanishini intiqib kutmoqdamiz va jamoamizning oʻyiniga juda optimistik qaraymiz. Oʻzbekistonning bizga qarshi oʻyin rejasi qanday boʻlishini va murabbiy Fabio Kannavaro bizning kuchli tomonlarimizga qarshi qanday kurashishini va zaif tomonlarimizdan foydalanishni rejalashtirayotganini koʻrishga qiziqamiz.
- Kolumbiya milliy jamoasining jahon chempionatidagi asosiy maqsadi nima?
- Kolumbiyaning asosiy maqsadi – 2014 yilda Braziliyada boʻlib oʻtgan jahon chempionatidagi natijalariga tenglashish yoki undan ham yaxshiroq natijalar qayd etishdir. Oʻshanda jamoa birinchi marta chorak finalga chiqqandi. Bu Xames Rodriges va boshqa kolumbiyalik futbolchilar uchun eng muhim xalqaro futbol turniridagi soʻnggi ishtirokini yakunlashning ajoyib usuli boʻladi.
- Oʻzbekiston milliy jamoasi haqida nimalarni bilasiz?
- Biz Oʻzbekiston milliy jamoasini jahon futboli tarixidagi eng buyuk afsonalardan biri Fabio Kannavaro boshqarayotganini bilamiz. Oʻz uslubiga sodiq qolgan holda bu jamoa himoya va taktik intizomga koʻp ahamiyat beradi va hujumga tezkor oʻtishlar bilan juda xavfli boʻlishi mumkin.
- Bilamizki, Kolumbiya OAVda bizning milliy jamoamiz haqida maqolalar yozishmoqda. Umuman, u yerda bizning jamoamizga qanday eʼtibor qaratilmoqda?
- Kolumbiyadagi ommaviy axborot vositalari Oʻzbekiston milliy jamoasiga katta eʼtibor qaratmoqda. Asosan, ular bizning jahon chempionatidagi birinchi raqibimiz boʻlishi sababli. Biz har bir jamoa uchun turnirni yaxshi natija bilan boshlash qanchalik muhimligini bilamiz. Bu jamoaning oʻziga boʻlgan ishonchi hamda ruhiyati uchun juda muhim boʻlishi mumkin. Bundan tashqari, ushbu Osiyo jamoalarining strategiyasi ortga chekilib, qarshi hujumda oʻynaydimi yoki ular bizni boshqacha yondashuv bilan hayratda qoldiradimi, degan savol katta qiziqish uygʻotmoqda.
- Ushbu uchrashuvdan oldin Kolumbiya OAVda qiziqish qanchalik yuqori?
- Birinchi jahon chempionati oʻyini oldidan ommaviy axborot vositalari va kolumbiyalik muxlislarning qiziqishi odatdagidek, juda yuqori. Futbol mamlakatimizdagi eng muhim sport turi. Shuning uchun sizga ishonch bilan aytamanki, 50 million kishi milliy jamoaning debyutini tomosha qiladi va birinchi uchrashuvda uch ochkoni qoʻlga kiritishlariga juda umid bilan qaraydi.
- Tabiiyki, siz ham Oʻzbekiston milliy jamoasi haqida maʼlumotlar bilan qiziqqansiz. Ayting-chi, bu masalada sizni nima hayron qoldirdi?
- Oʻzbekiston milliy jamoasini oʻrganib chiqqanimdan soʻng hujumchi va barcha davrlarning eng yaxshi toʻpurari Eldor Shomurodov va darvozabon Oʻtkir Yusupov kabi tajribali oʻyinchilar, shuningdek, oʻyinga tezlik va shiddat bagʻishlaydigan yosh isteʼdodlar meni hayratga soldi. Bu barcha pozitsiyalarda muvozanatli jamoa boʻlib, har qanday raqibga qiyinchilik tugʻdirishi mumkin. Xuddi bir necha kun oldin Niderlandiyaga qarshi oʻyinda boʻlgani kabi.
- Meksikada oʻtadigan Oʻzbekiston – Kolumbiya oʻyinida yurtingizdan qancha muxlis keladi, deb oʻylaysiz?
- Qoʻshma Shtatlar va Kanadadan tashqari Meksika Kolumbiya aholisi eng koʻp boʻlgan 10 ta davlatdan biri boʻlib, taxminan 250 000 aholi yashaydi. Bu asosan qulay ish sharoitlari, til va madaniy oʻxshashliklar tufayli. Shu sababli «Estadio Ciudad de Mexico» stadionida boʻlib oʻtadigan oʻyinga 50 000 dan 60 000 gacha kolumbiyaliklar tashrif buyurishi ehtimoli juda yuqori.
- Shuningdek, jahon chempionatida Kolumbiya milliy jamoasini yoritish uchun qancha jurnalist kelgan?
- Sizga aniq raqamni ayta olmayman. Lekin aminmanki, ilgari hech qachon bunday kolumbiyalik jurnalistlar jahon chempionatini yoritish uchun safar qilmagan. Bizning har bir mezbon mamlakatda matbuot vakillarimiz bor. Ular eng yaxshi jamoalarni, Janubiy Amerika jamoalarini hamda albatta, milliy jamoamiz oʻynaydigan har bir shaharni kuzatib borishadi.
- Bizning guruhimiz haqida nima deysiz? Uni koʻpchilik «oʻlim guruhi» deb taʼriflamoqda…
- Albatta, menimcha, «K» guruhi «Oʻlim guruhi» boʻlib, Portugaliya chempionlik uchun asosiy daʼvogarlaridan biri. Kolumbiya 2024 yilgi Amerika Kubogida ikkinchi oʻrinni egallagan va turnirning eng yaxshi oʻyinchilari boʻlishi mumkin boʻlgan Kongo bilan Oʻzbekiston milliy jamoalari. Har bir jamoa 1\8 finalga yoʻllanmani qoʻlga kirita olmagan va har bir oʻyin juda qiziqarli boʻladi.
