Белгия футбол федерацияси АҚШ миллий жамоаси ҳужумчиси Фоларин Балогунга нисбатан ФИФА қабул қилган қарордан норозилигини билдирди. Бу ҳақда хориж матбуоти хабар бермоқда.
Гап шундаки, ФИФА футболчининг қизил карточкаси бўйича дисквалификацияни вақтинча тўхтатди. Натижада Балогун Белгия миллий жамоасига қарши Жаҳон чемпионати 1/8 финал баҳсида майдонга тушиши мумкин.
Белгия футбол федерацияси вакиллари бу қарордан ҳайратда қолганини маълум қилди. Уларнинг таъкидлашича, амалдаги турнир регламенти ва ФИФА Интизом кодексига мувофиқ, қизил карточка олган футболчи кейинги баҳсни автоматик равишда ўтказиб юбориши лозим.
Шунингдек, Белгия футбол федерацияси ФИФА қарорига нисбатан қандай ҳуқуқий чоралар кўриш мумкинлигини ўрганаётганини билдирган.
Эслатиб ўтамиз, АҚШ ва Белгия ўртасидаги Жаҳон чемпионати 1/8 финал баҳси 7 июл куни бўлиб ўтади.
