Portugaliya milliy jamoasi hujumchisi Krishtianu Ronaldu JCH-2026 1/8 finalida Ispaniyaga qarshi uchrashuv oldidan milliy jamoadagi faoliyatini qachon yakunlashi haqidagi savolga javob berdi.
«18 yoshimda milliy jamoaga kelganimdan beri hech narsa o‘zgarmadi va bundan keyin ham o‘zgarmaydi. Men doimo shu yerda bo‘laman — qalban ham, tanim bilan ham. O‘ynaymanmi yoki yo‘qmi, baribir jamoada muhim o‘rnim bo‘ladi.
Bir necha yil avval aytganimdek, faoliyatimni o‘zim istagan paytda yakunlayman. Boshqalar xohlagan vaqtda emas. Shu savolni qayta-qayta berishning ma'nosi yo‘q. Men bunga ortiqcha e'tibor qaratishni istamayman. Eng muhimi — ertaga yaxshi o‘ynash va keyingi bosqichga chiqish», — dedi Ronaldu.
Eslatib o‘tamiz, Portugaliya JCH-2026 1/8 finalida Ispaniyaga qarshi maydonga tushadi.
Ma'lumot uchun, ushbu uchrashuv 6 iyul kuni bo‘lib o‘tadi. G‘olib jamoa jahon chempionatining chorakfinal bosqichiga yo‘l oladi.
