Ўзбекистон миллий жамоасининг собиқ футболчиси Илёс Зейтуллаев Криштиану Роналдунинг Португалия миллий жамоасидаги ўрни ҳақида гапирди.
«Криштианунинг номи жамоага таъсир қилади. Футболчининг ўзи ҳам буни тушуниши керак. Роналдунинг 90 дақиқа давомида майдонда бўлиши Португалия миллий жамоасининг асосий муаммоси», — дея Зейтуллаевнинг сўзларини келтирди Metaratings.ru нашри.
Португалия миллий жамоаси Жаҳон чемпионати гуруҳ босқичидаги илк турда Конго ДРга қарши баҳсда кутилмаганда 1:1 ҳисобида дуранг ўйнади.
Эслатиб ўтамиз, Роберто Мартинес шогирдлари мундиалдаги навбатдаги баҳсини Ўзбекистон миллий жамоасига қарши ўтказади. Мазкур беллашув ҳар икки жамоа учун гуруҳдаги вазиятни яхшилаш нуқтаи назаридан муҳим аҳамият касб этади.
