Бразилия миллий жамоаси ва «Барселона» вингери Рафиня Диаснинг оиласи собиқ футболчи Вампетанинг сўзларига кескин муносабат билдирди.
2002 йилги жаҳон чемпиони аввалроқ Рафиня шахсий ҳаётидаги муаммоларни бошдан кечираётгани ва вазиятни ўзгартириш мақсадида Саудия Арабистонининг «Ал Ҳилол» клубига ўтиш вариантини кўриб чиқаётгани ҳақида гапирганди. Вампетанинг таъкидлашича, бу маълумот унга футболчига яқин инсонлардан етиб келган.
Бироқ Рафинянинг қариндошлари ушбу маълумотларни рад этди. Футболчининг амакиваччаси Игор Падиля ижтимоий тармоқларда тарқалган интервю парчасига жавоб қайтарди.
«Бу ёлғонлар учун изоҳ беришингга тўғри келади, дўстим», — деди Падиля Goal.com нашрига.
Маълумот учун, ҳозирда Рафинянинг асосий эътибори сон орқа қисмидаги жароҳатдан тикланишга қаратилган. Футболчи ушбу жароҳатни Ҳаити миллий жамоасига қарши баҳсда олган ва унинг Жаҳон чемпионатининг қолган ўйинларида майдонга тушиши сўроқ остида турибди.
