Аргентина миллий жамоаси ҳужумчиси Лионел Месси Австрияга қарши бўлиб ўтадиган Жаҳон чемпионати гуруҳ босқичи баҳсида бирданига учта рекордни янгилаш имкониятига эга.
Мессига кетма-кет олтита Жаҳон чемпионати ўйинида гол уриш рекордини такрорлаш учун яна битта гол етишмаяпти. Ҳозирча ушбу натижа Жюст Фонтен ва Жаирзинёга тегишли.
Шунингдек, аргентиналик футболчи мундиаллар тарихидаги энг яхши тўпурарлар рўйхатида Мирослав Клозе билан биринчи ўринни бўлишиб турибди. Ҳар икки футболчи ҳисобида 16 тадан гол мавжуд. Австрия дарвозасига уриладиган навбатдаги гол Мессини якка пешқадамга айлантиради.
Бундан ташқари, Месси Жаҳон чемпионатларида жарима майдончаси ташқарисидан урилган голлар бўйича ҳам рекордини мустаҳкамлаши мумкин. Ҳозирда унинг ҳисобида бундай голлардан бештаси бор.
Маълумот учун, Аргентина ва Австрия миллий жамоалари ўртасидаги баҳс 22 июн куни бўлиб ўтади. Аргентина илк турда Жазоирни 3:0 ҳисобида мағлуб этган ва гуруҳ пешқадамларидан бири бўлиб турибди.
