Португалиялик футбол агенти Паулу Барбоза Жаҳон чемпионатида Португалия ва Ўзбекистон миллий жамоалари ўртасида бўлиб ўтадиган баҳс ҳақида фикр билдирди.
«Агар Португалиянинг Конго ДРга қарши ўйинидан келиб чиқадиган бўлсак, жамоамизнинг ғалабасига ишончим комил эмас. Мен Ўзбекистоннинг Колумбияга қарши баҳсини томоша қилдим.
Менинг фикримча, Ўзбекистон Конго ДРдан кучлироқ жамоа. Колумбия ҳақида эса гапирмаса ҳам бўлади. Португалияни жуда қийин ўйин кутмоқда.
Жамоа таркиби ва айниқса ҳужумдаги ўйинни зудлик билан ўзгартириш керак», — дея Барбозанинг сўзларини келтирди «Спорт-Экспресс» нашри.
Шунингдек, агент Бернарду Силва ва Витиня ўйинига ҳам тўхталиб, Португалия миллий жамоасининг айрим футболчилари оптимал спорт формасида эмаслигини таъкидлади.
Эслатиб ўтамиз, Португалия миллий жамоаси Жаҳон чемпионатидаги илк баҳсида Конго ДР билан 1:1 ҳисобида дуранг ўйнаган. Ўзбекистон миллий жамоаси эса Колумбияга қарши беллашувда мағлуб бўлганига қарамай, ўйини билан кўплаб мутахассислар эътиборини тортганди. Португалия — Ўзбекистон баҳси 23 июн куни бўлиб ўтади.
