Жаҳон чемпионатининг 1/8 финалида Аргентина ва Миср ўзаро баҳс олиб борар экан, 2016 йилда Лионел Месси иштирокида юз берган можаро яна ёдга олинди.
Ўша йили Месси Арабистоннинг МBC телеканалига берган интервюсида ўзининг бир жуфт бутсасини аукционга қўйиб, ундан тушадиган маблағни Мисрдаги хайрия ишлари учун йўналтиришни таклиф қилган.
Бироқ бу ташаббус Мисрда салбий қарши олинган. Айрим сиёсатчилар ва жамоатчилик вакиллари аргентиналик футболчининг ҳаракатини мамлакатни таҳқирлаш сифатида баҳолаган.
Жумладан, Миср парламенти депутати Саид Асасин ўзининг ўнг туфлисини Аргентинага юборишни ва у билан Мессига зарба беришни таклиф қилган. Миср футбол федерациясининг собиқ вакили Азми Мегаҳед эса: «Бутсаларини яхшиси камбағал аргентиналикларга берсин», — деган.
Маҳаллий ОАВнинг таъкидлашича, бунга араб дунёсидаги маданий қарашлар сабаб бўлган. Араб мамлакатларида оёқ кийими ифлослик ва таҳқир рамзи ҳисобланади. Шу боис оёқ кийимини совға қилиш ёки унинг таг қисмини кўрсатиш айрим ҳолатларда ҳақорат сифатида қабул қилиниши мумкин.
Қайд этилишича, Месси эса бу ташаббусни фақат хайрия мақсадида илгари сурган ва маданий тафовутлар можаронинг юзага келишига сабаб бўлган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади