Александр Крестинин: «Ҳар қандай ҳолатда ҳам мундиалдаги иштирок Ўзбекистон учун катта тажриба бўлди»

Россиялик 47 ёшли мураббий Александр Крестинин табиийки, ўзбек мухлислари учун жуда яхши таниш. Боиси, у 2023 ва 2024 йилги мавсумларда Суперлигамизда ишлаган. Ўшанда «Локомотив» ва «Бунёдкор» клубларини бошқарган. Шундан кейин Қирғизистон ҳамда Тожикистон чемпионларида ҳам фаолият кўрсатди.

Куни кеча Tribuna.uz журналисти ушбу мутахассисга бир қатор саволлар билан мурожаат қилди.

- Александр Сергеевич, охирги клубингиз Тожикистоннинг «Хўжанд» жамоаси эди. Аммо, адашмасам, шундан бери бирор жойда кўриниш берганингиз йўқ.

- «Хўжанд»дан кейин хизматимга қизиққан бир қанча клублар алоқага чиқишди. Аммо юрагим жиз этадиган таклифлар бўлмади. Шу боис ҳозиргача бўшман ва таклифларга очиқман.

- Жаҳон чемпионатини мухлис сифатида кузатяпсизми ёки мутахассис кўзи билан кўряпсизми?

- Биласизми, анчадан бери у ёки бу жамоага мухлислик қилмасдан қўйганман. Футболни эса касбий кўникмаларимдан келиб чиқиб, мутахассис сифатида томоша қилишга одатланганман.

- Бизнинг миллий жамоамизнинг мундиалдаги илк иштирокига қандай баҳо бера оласиз?

- Ўзбекистон миллий жамоасининг жаҳон чемпионатига чиққани - бу катта муваффақият. Миллий жамоада яхши футболчилар жам бўлган. Бу жамоада катта потенциал бор. Афсуски, ЖЧаги илк иштирок омадли чиқмади. Унинг ўйинларига баҳо бериш мураббийлар штаби, федерация мутасаддиларининг ички иши. Мухлис сифатида айтадиган бўлсам, бу жамоа янада яхшироқ ўйнай олади. Чунки таркибда индивидуал жиҳатдан кучли футболчилар талайгина. Ҳарқалай, ЖЧ чоғида улар ўзларидаги қобилиятни намойиш қила олдилар. Бошқа томонлама олиб қараганда, дебютант анча ҳаяжонланади, ўзини кучли босим остида ҳис қилади. Лекин ҳар қандай шароитда ҳам бу мусобақа миллий жамоа учун катта тажриба бўлди.

- Айтинг-чи, миллий жамоамизда сизга кўпроқ қайси футболчининг ўйинлари ёқди?

- Бу саволингизга дабдурустдан у ёки бу футболчи бошқалардан зўр ўйнади, дейиш қийин. Кўрдим, бутун жамоа ҳаракат қилди. Умуман олганда, бирор жамоада ишлаётганимда ҳам ўз шогирдларим бўладими ё рақиб аъзоларими, алоҳида баҳо беришга одатланмаганман. Футбол - жамоавий ўйин. Фақат шуни айтишим керакки, миллий жамоангизда ҳамма бир тану, бир жон бўлиб тўп сурди.

- Фараз қилайлик, миллий жамоамиз бошқа гуруҳда бўлганида кейинги босқичга чиққан бўлармиди?

- Жаҳон чемпионатида осон ё қийин гуруҳлар бўлмайди. Бу менинг фикрим. Эҳтимол, қоғозда у ё бу гуруҳ кўзга осондек кўриниши мумкин. Бироқ майдонга чиққанда кучсиз кўринган жамоа ҳам бошқача кўрина бошлайди. Бунақа пайтда ҳамма ўз мамлакати шаънини ҳимоя қилиш учун киришганини англаб, катта шижоат билан тўп суришга киришади. Тўғри, тажриба, маҳорат ва таниқлилик борасида фарқ бўлиши мумкин. Аммо Ўзбекистоннинг келажаги ёрқин бўлишига ишонаман. Бу сафар кутилган даражадаги иштирок бўлмагандир, лекин кейинги мусобақаларда ҳаммаси ўзгариши тайин. Қуръанинг омадли ё омадсиз келгани ҳақидаги гаплар юзасидан тортишиш бефойда.

- Мундиалда қайси терма жамоаларга мухлислик қиляпсиз?

- Жаҳон чемпионатида бирор терма жамоага ишқибозлик қилаётганим йўқ. Умумий маънода айтсам, Аргентина, Испания ва Франция бошқаларга нисбатан барқарорроқ кўринмоқда. Португалия ҳам чакки эмас. Аммо бошқалардан ҳам кўра Франциянинг шашти баландроқлиги сезилиб турибди. Юқорида айтиб ўтганимдек, бирор-бир терма жамоага мухлислик қилаётганим йўқ.

- Агар Фабио Каннаваро билан учрашиб қолганингизда унга қандай савол берардингиз?

- Каннаваро учун ҳам бу мураббий сифатидаги илк ЖЧ эканлигини тушуниш керак. Чунки у илгари бирор каттароқ жамоада ишламаган. Шуни ҳам инобатга олиш керак. Агар иложи бўлганидами, мен ундан
15 майга қайтишнинг имкони бўлганида мусобақа учун тайёргарлик режасини ўзгартиришни сўраган бўлардим.