Франция миллий жамоасининг собиқ ҳужумчиси Кристоф Дюгарри Килиан Мбаппенинг «Реал»даги ўйини борасидаги танқидларга муносабат билдирди.
«Бу мутлақо бемаънилик. Мбаппени танқид қилаётганлар стадионга бориб ўйинларни кўришадими ёки йўқми, билмайман. Футболчи 44 та ўйинда 42 та гол урди, аммо барибир «Реал»нинг совринсиз қолишида айнан у айбдор дейишмоқда. Буни қабул қилиб бўлмайди.
Албатта, ҳар доим футболчидан янада яхшироқ ўйин кутиш мумкин. Аммо 44 учрашувда 42 та гол урган футболчидан яна нимани талаб қилиш мумкин?», — деди Дюгарри.
Унинг фикрича, агар Мбаппе танқид қилинса, унда бошқа етакчи футболчилар ҳам бундан четда қолмаслиги керак.
«Агар испанияликлар Мбаппени танқид қилмоқчи бўлса, унда Жуд Беллингҳэмни, Винисиусни ва Жаҳон чемпионатида миллий жамоалари сафида «Реал»дагидан яхшироқ ўйнаган бошқа футболчиларни ҳам танқид қилишлари керак.
Агар уларнинг барчаси терма жамоада яхшироқ ўйнаётган бўлса, демак муаммо Мбаппеда эмас, балки «Реал»нинг ўзида.
Ҳа, Мбаппе бундан ҳам яхшироқ ўйнаши мумкин. Унинг майдондаги муносабати ва етакчилик фазилатларини янада кучайтириши кераклиги ҳақидаги фикрга қўшиламан. Аммо бунинг учун унга бироз вақт керак бўлиши мумкин», — дея қўшимча қилди Дюгарри.
Мухлислар бу янгиликни Telegram’да муҳокама қилмоқда
Изоҳлар Telegram’да очилади