UFCнинг ярим оғир вазн тоифасидаги собиқ чемпиони россиялик Магомед Анкалаев UFC Fight Night турнирининг асосий жангида Ўзбекистон вакили Богдан Гусковга қарши октагонга чиқади.
Америкалик Ҳалил Раунтри Жуниор жароҳати сабаб жангни ўтказиб юборади. UFC унга тезкор равишда ўринбосар топди ва у ярим оғир вазн тоифаси рейтингида 10-ўринни эгаллаб турган Гусков бўлди.
«Жароҳат туфайли Ҳалил Раунтри Жуниор UFC Абу-Даби турнирининг асосий жангида иштирок этмайди. Унинг ўрнини Ўзбекистоннинг энг яхши жангчиси ва рейтингда 10-ўринда турган Богдан Гусков эгаллайди.
18 та ғалаба, 18 таси ҳам муддатидан аввал якунланган. Шундан 13 таси 1-раундда қайд этилган. Гусков UFCдаги илк асосий жангида собиқ чемпион Магомед Анкалаевга қарши ўз имкониятини тўлиқ ишга солишга ҳаракат қилади. Ярим оғир вазндаги бу тўқнашувни ўтказиб юборманг», — дейилади UFC баёнотида.
Қайд этиш лозим, UFC Fight Night турнири 25 июл куни БААнинг Абу-Даби шаҳрида бўлиб ўтади. Иккинчи асосий жангда ҳам яна бир ўзбекистонлик жангчи Рамазон Темиров австралиялик Стив Эрцегга қарши октагонга кўтарилади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади