Vitinya Ronaldusiz g'alabadan so'ng: «So'nggi vaqtlardagi eng yaxshi o'yinimiz bo'ldi»

Portugaliya milliy jamoasi yarimhimoyachisi Vitinya Millatlar Ligasidagi Daniyaga (4:2) qarshi o'yindan so'ng o'z fikrlari bilan o'rtoqlashdi.

— Milliy jamoaning uchta o'yindagi uchinchi g'alabasi Portugaliyani keyingi bosqichga chiqishga ancha yaqinlashtirdi. Jamoa kuchayayotgani ham ko'rinib turibdi. Buning sababi nimada?

— Murabbiyning mehnati tufayli. Ajoyib o'yin o'tkazdik, buni yashiradigan joyi yo'q. Bu yerda g'alaba qozonish juda muhim edi, bu oson emas. Ikki yil avval bu yerga kelganimizda olgan sabog'imiz bor edi. O'shanda mag'lub bo'lgandik va bahs juda og'ir kechgandi. Bugun ham xuddi shunday bo'ldi, hisob sizlarni chalg'itmasin.

Ammo, menimcha, g'alabadan ham muhimi — aynan o'yinimizning mazmuni. Bu so'nggi vaqtlardagi eng yaxshi o'yinimiz bo'ldi.

Bu uchta uchrashuvda biz asta-sekin kuchayib bordik. Murabbiy bilan qancha ko'p vaqt birga ishlasak, uning g'oyalarini shuncha yaxshi o'zlashtiramiz va maydondagi o'zaro hamkorligimiz ham ortib boradi. Himoyada biz doimo ishonchli o'ynaganmiz, bugun esa, menimcha, hujumda ham bir qadam oldinga tashladik. Umid qilamanki, shu ruhda davom etamiz.

— Jorje Jezush Roberto Martines qilgan ishlar ahamiyatini kamaytirmagan holda jamoaga juda katta o'zgarishlar kiritdi. Jamoa butunlay boshqacha ko'rinishda.

— Aytganimdek, murabbiyning mehnati o'z natijasini bera boshladi va bu allaqachon ko'rinib turibdi. Yaxshiyamki, hammasi yaxshi ketyapti. Biz ham aynan shu tarzda davom etmoqchimiz.

Hozir esa barcha muxlislarga murojaat qilmoqchiman. Bilamanki, ular bizni qo'llab-quvvatlashda davom etishadi. Ular «Dragau» stadionini to'ldirib, Norvegiya ustidan g'alaba qozonishimizga yordam berishsin. To'rtta o'yinda to'rtta g'alaba — ideal natija bo'lardi.

— Ronaldu bilan bog'liq yuz bergan voqealarga e'tibor berdingizmi?

— Biz diqqatimizni o'yinga qaratishga urindik va aynan shunday qildik. Menimcha, sodir bo'lgan barcha voqealarga juda yaxshi javob qaytardik. Butun jamoani shu natija bilan tabriklayman, — dedi Vitinya RTP efirida.