«Brayton» vakillari APLda oyning eng yaxshilari deb topildi

«Brayton» yarim himoyachisi Paskal Gross APLda sentyabr oyining eng yaxshi futbolchisi deb topildi.

35 yoshli nemis futbolchisi o‘tkazilgan 3 ta o‘yinda 2 ta gol urdi, 3 ta golli uzatmani amalga oshirdi va «chaykalar»ga o‘tgan oyni mag‘lubiyatsiz yakunlashga yordam berdi.

Paskal Muhammad Bellumi («Hall»), Jayden Bogle («Lids»), Aleksander Isak va Jeremi Jake (ikkalasi ham — «Liverpul»), Xaralambos Kostulas («Brayton»), Kevin Shade («Brentford») hamda Antuan Semenyoni («Manchester Siti») ortda qoldirdi.

Grossdan kattaroq yoshda ushbu sovrinni qo‘lga kiritgan atigi besh futbolchi bor: Styuart Pirs (38 yosh 10 oy), Teddi Sheringem (38 yosh 6 oy), Krishtianu Ronaldu (37 yosh 2 oy), Janfranko Zola (36 yosh 3 oy) va Pol Skoulz (35 yosh 9 oy).

«Brayton» ustozi Fabian Hurzeler esa oyning eng yaxshi murabbiyi deb topildi. Nemis mutaxassisi o‘tgan oyda jamoa bilan 3 ta bahsda 2 ta g‘alaba va 1 ta durang qayd etib, to‘plar nisbati bo‘yicha «+8» natijaga erishdi.

33 yoshli murabbiy ovozlar soniga ko‘ra Andoni Iraola («Liverpul») va Enso Mareskani («Manchester Siti») ortda qoldirdi. Fabian faoliyatida ikkinchi bor APLda oy murabbiyiga aylandi. Birinchisi 2024 yil avgust oyiga to‘g‘ri keladi.

Oyning eng chiroyli goli muallifi ham «Brayton»dan bo‘ldi. Jamoa sardori Lyus Dankning «Koventri»ga (5:0) qarshi bahsdagi goli nominatsiyada g‘olib chiqdi.