Karrager: «Siti»ning chempionliklari bekor qilinishi kerak»

«Liverpul»ning sobiq himoyachisi Jeymi Karrager «Manchester Siti»ga qanday jazo berilishi kerakligi haqidagi savolga javob berdi.

O‘tgan hafta «shaharliklar» APLning moliyaviy qoidalarini buzish bilan bog‘liq deyarli barcha ayblovlar bo‘yicha aybdor deb topilgandi — faqat bitta band bundan mustasno. 2023-yil fevral oyida APL «Siti»ni 2009–2018-yillar oralig‘ida moliyaviy qoidalarni 115 marta buzganlikda ayblagandi. Keyinroq The Times nashri gap 115 emas, balki 130 ta qoidabuzarlik haqida borayotganini xabar qildi:

29-sentyabr kuni esa APL klub barcha bandlar bo‘yicha aybdor deb topilganini ma’lum qildi.

— «Liverpul» 2014-yilda chempionlikni qo‘ldan chiqardi. Boshqa klublarga yetkazilgan zararni qoplash kerakmi? Agar o‘sha paytda «Liverpul» futbolchisi bo‘lganingizda, shunday yo‘l bilan medal olishni xohlarmidingiz?

— Menimcha, «Manchester Siti»ning shu davrda qo‘lga kiritgan chempionlik unvonlari va sovrinlari bekor qilinishi kerak. Ularni boshqa klublarga berish kerakmi-yo‘qmi — bu biroz boshqa masala.

Ammo «Manchester Siti»ning qilgan eng asosiy ishi shu... Endi ularning futbolchilari olgan sovrinlar va medallarga hech kim avvalgidek qaramaydi. Men bir nechta medal yutish baxtiga muyassar bo‘lganman, keyin esa ularga hech qachon qaramaganman. Ammo o‘sha lahzalar haqida xotiralarim bor: katta o‘yinda hakam hushtagi chalinganidagi hissiyot, darvozaboning penalti tepishini qaytargan paytdagi tuyg‘ular...

Bu futbolchilar endi hech qachon bunday hisni tuya olmaydi — «Manchester Siti» ularni o‘g‘irlab qo‘ydi.

Menimcha, hech bir futbolchini sovrinlar xonasiga ilib qo‘yish mumkin bo‘lgan medal berishlari qiziqtirmaydi. Bu uni qiziqtirmaydi, u medalga qaramaydi — unda o‘sha xotiralar bo‘lmaydi. Shuning uchun futbolchilarga o‘sha medallarni berish unchalik muhim emas, deb o‘ylayman — chunki lahza qo‘ldan boy berilgan.

Futbolda g‘alaba qozonganingda, hech kim medallarni eslamaydi — gap hissiyotlarda. Bu — tushuntirib bo‘lmaydigan tuyg‘u, shuning uchun futbolchi bo‘lish — juda o‘ziga xos narsa. Demak, sovrinlar yoki medallar boshqa futbolchilarga beriladimi yoki yo‘qmi — ularning hech qanday ahamiyati yo‘q.

Bu nafaqat futbolchilarga, balki muxlislarga ham tegishli. «Liverpul», «Manchester Yunayted» yoki boshqa klublarning muxlislari inson umrining oxirigacha o‘zi bilan olib yuradigan ana shu unutilmas lahzalardan mahrum bo‘lishdi. Hikoyalar, xotiralar... Gap medallarda emas, hissiyotlarda — «Siti» odamlardan aynan shu narsani o‘g‘irladi, — deya Karragerning so‘zlarini keltiradi Sky Sports.