Витиня Роналдусиз ғалабадан сўнг: «Сўнгги вақтлардаги энг яхши ўйинимиз бўлди»

Португалия миллий жамоаси яримҳимоячиси Витиня Миллатлар Лигасидаги Данияга (4:2) қарши ўйиндан сўнг ўз фикрлари билан ўртоқлашди.

— Миллий жамоанинг учта ўйиндаги учинчи ғалабаси Португалияни кейинги босқичга чиқишга анча яқинлаштирди. Жамоа кучаяётгани ҳам кўриниб турибди. Бунинг сабаби нимада?

— Мураббийнинг меҳнати туфайли. Ажойиб ўйин ўтказдик, буни яширадиган жойи йўқ. Бу ерда ғалаба қозониш жуда муҳим эди, бу осон эмас. Икки йил аввал бу ерга келганимизда олган сабоғимиз бор эди. Ўшанда мағлуб бўлгандик ва баҳс жуда оғир кечганди. Бугун ҳам худди шундай бўлди, ҳисоб сизларни чалғитмасин.

Аммо, менимча, ғалабадан ҳам муҳими — айнан ўйинимизнинг мазмуни. Бу сўнгги вақтлардаги энг яхши ўйинимиз бўлди.

Бу учта учрашувда биз аста-секин кучайиб бордик. Мураббий билан қанча кўп вақт бирга ишласак, унинг ғояларини шунча яхши ўзлаштирамиз ва майдондаги ўзаро ҳамкорлигимиз ҳам ортиб боради. Ҳимояда биз доимо ишончли ўйнаганмиз, бугун эса, менимча, ҳужумда ҳам бир қадам олдинга ташладик. Умид қиламанки, шу руҳда давом этамиз.

— Жорже Жезуш Роберто Мартинес қилган ишлар аҳамиятини камайтирмаган ҳолда жамоага жуда катта ўзгаришлар киритди. Жамоа бутунлай бошқача кўринишда.

— Айтганимдек, мураббийнинг меҳнати ўз натижасини бера бошлади ва бу аллақачон кўриниб турибди. Яхшиямки, ҳаммаси яхши кетяпти. Биз ҳам айнан шу тарзда давом этмоқчимиз.

Ҳозир эса барча мухлисларга мурожаат қилмоқчиман. Биламанки, улар бизни қўллаб-қувватлашда давом этишади. Улар «Драгау» стадионини тўлдириб, Норвегия устидан ғалаба қозонишимизга ёрдам беришсин. Тўртта ўйинда тўртта ғалаба — идеал натижа бўларди.

— Роналду билан боғлиқ юз берган воқеаларга эътибор бердингизми?

— Биз диққатимизни ўйинга қаратишга уриндик ва айнан шундай қилдик. Менимча, содир бўлган барча воқеаларга жуда яхши жавоб қайтардик. Бутун жамоани шу натижа билан табриклайман, — деди Витиня RTP эфирида.