Фердинанд: «Роналдуга шон-шараф. Криштианугача Португалия қаерда эди?»

«Манчестер Юнайтед»нинг собиқ ҳимоячиси Рио Фердинанд Криштиану Роналдунинг Португалия миллий жамоаси йиғинини тарк этганидан кейинги вазият ҳақида фикр билдирди.

Эслатиб ўтамиз, 1 октябр куни Копенҳагенда Данияга (4:2) қарши Миллатлар лигаси баҳси арафасида 41 ёшли ҳужумчи бош мураббий Жорже Жезуш билан юзага келган келишмовчилик сабабли миллий жамоа сафини тарк этганди. Шундан сўнг Криштиану Португалиядаги фаолиятини якунлагани ҳақида хабарлар тарқалди.

Фердинанд ўз подкастидан Роналдунинг фаолияти ҳақида фикр юритган парчани эълон қилди.

«Криштиану Роналдуга қадар Португалия қаерда эди? Умуман, нимагадир эришганмиди? Ҳеч бўлмаса йирик турнирларга чиқармиди? Бирор нарса ютиши ҳақида гапирмасак ҳам бўлади.

Кўпчилик унинг фаолиятига сўнгги 3-4 йил нуқтаи назаридан баҳо бераётгани жаҳлимни чиқаради. У ҳали ҳам ўз ёшидаги футболчи учун фантастик статистика қайд этмоқда. У қайси лигада ўйнаётгани муҳим эмас — барибир бу жуда юқори кўрсаткичлар.

Менимча, кўпчилик бир дақиқа бўлса ҳам ўтмишга қайтиши керак... Унинг «Ювентус»даги даврини эслаш, у ерда нималарга эришганини кўриш лозим. «Реал»даги даврини ҳам. Ва «Манчестер Юнайтед»даги фаолиятини. Шундай таассурот пайдо бўладики, гўё у учта футболчилик фаолиятини битта карерага жамлаган. Жаҳон даражасидаги учта карера», — деди Фердинанд видеода.

«Роналдуга шон-шараф! Илтимос, бу футболчига бироз ҳурмат кўрсатинг!» — деб ёзди Англия миллий жамоасининг собиқ футболчиси ўз постига.

Португалия жами тўққиз 9 жаҳон чемпионатига йўлланма олган. Ушбу иштирокларнинг 6 таси Роналду 2003 йил август ойида миллий жамоада дебют қилганидан кейин амалга ошган.

Португалия, шунингдек, 9 бор Европа чемпионатининг финал босқичида иштирок этган, уларнинг 6 таси Роналду даврига тўғри келади.

Криштиану Роналду билан бирга Португалия ўз тарихидаги илк совринларни ҳам қўлга киритди: 2016 йилда Европа чемпионати, 2019 ҳамда 2025 йилларда Миллатлар лигаси.