Fransiya milliy jamoasi himoyachisi Malo Gyusto JCH-2026 guruh bosqichining navbatdagi uchrashuvi oldidan jarohat oldi.
RMC Sport xabariga ko‘ra, futbolchi mashg‘ulot vaqtida jamoadoshlari bilan to‘qnashib ketgan va to‘pig‘idan shikastlangan.
Vaziyatdan so‘ng Gyusto maydonda qolib ketgan, keyin esa tibbiy xodimlar unga yordam ko‘rsatgan. Himoyachi jarohatlangan oyog‘iga muz qo‘ygan holda mashg‘ulotni davom ettira olmagan.
Hozircha futbolchining jarohati qay darajada jiddiy ekani haqida rasmiy ma’lumot berilmagan. Fransiya milliy jamoasi tibbiy shtabi qo‘shimcha tekshiruvlar o‘tkazishi kutilmoqda.
Eslatib o‘tamiz, Didye Desham boshqaruvidagi jamoa JCH-2026 guruh bosqichining ilk turida Senegalni 3:1 hisobida mag‘lub etgan edi.
Fransuzlar navbatdagi uchrashuvni 23 iyun kuni o‘tkazadi. Guruh bosqichining 2-turida ular Iroq terma jamoasiga qarshi maydonga tushadi.
Gyustoning ushbu bahsda ishtirok etishi yoki etmasligi uning tiklanish jarayoniga bog‘liq bo‘ladi.
