Англия миллий жамоаси бош мураббийи Томас Тухел Букайо Саканинг ЖЧ-2026 гуруҳ босқичидаги Ганага қарши учрашувни ҳам захира ўриндиғида бошлаши мумкинлигини маълум қилди.
Инглизлар илк турда Хорватияни 4:2 ҳисобида мағлуб этган баҳсда Сака иккинчи бўлимда майдонга тушиб, Маркус Рэшфорднинг голига ассист қайд этганди.
Шунга қарамай, мураббийлар штаби «Арсенал» футболчисининг ўйин дақиқаларини эҳтиёткорлик билан назорат қилмоқда. Бунга унинг пай қисмидаги муаммолар сабаб бўлмоқда.
«Букайо тайёр ва тобора яхшиланиб бормоқда. Менимча, гуруҳ босқичининг сўнгги ўйинига келиб у тўлиқ тайёр бўлади», - дея Тухелнинг сўзларини келтирди Goal нашри.
Маълумотларга кўра, Сака ўтган мавсум якунида «Арсенал»нинг Премер-лига чемпионлиги учун курашида оғриқлар билан ўйнаган. Бироқ Тухел футболчини мундиалнинг ҳал қилувчи босқичлари учун асраб-авайлашни мақсад қилган.
Шу боис Ганага қарши ўйинда ўнг қанотда яна Нони Мадуеке асосий таркибда майдонга тушиши кутилмоқда.
