Нидерландия миллий жамоаси бош мураббийи Роналд Куман ЖЧ-2026 гуруҳ босқичининг 2-турида Швеция устидан қозонилган 5:1 ҳисобидаги ғалабага баҳо берди.
Мутахассис айниқса Брайан Броббининг илк голини алоҳида эътироф этди.
«Биринчи голда мен кўришни истаган барча жиҳатлар мужассам эди. Биз Браян шундай вазиятларни яратишга қодир эканини биламиз. Барт Вербрюгген ҳужумни ажойиб бошлади. Кейин тезликдан фойдаландик ва Браян яна дарвоза қаршисида пайдо бўлди. Айниқса ҳужум дарвозабондан бошланганини ҳисобга олсак, бундан ҳам идеал голни тасаввур қилиш қийин», — деди Куман.
Мураббий Япония билан ўйиндаги дурангдан (2:2) кейин жамоа босим остида бўлганини ҳам тан олди.
«Албатта, ғалаба қозонишни истардик. Турнирни ғалаба билан бошлаш доимо хотиржамлик беради. Швецияга қарши ўйин олдидан босим юқорироқ эди, чунки бу баҳсда албатта ютишимиз кераклигини билардик. Лекин мен асабийликни ҳис қилмадим. Биринчи ўйиндан кейин жамоанинг қандай ишлаётганини ва футболчиларнинг кайфиятини кўриб, ҳаммаси назорат остида эканини тушунасиз.
Эҳтимол, бу сафар амалга оширилган ўзгаришлар олдинги ўйинга қараганда яхшироқ бўлгандир», — деди у кулиб.
Шунга қарамай, мураббий жамоа ҳали мукаммал ўйин намойиш этмаганини таъкидлади.
«Натижа ажойиб, аммо ҳали яхшилашимиз керак бўлган вазиятлар етарлича бўлди. Фақат шундагина ўйин тўлиқ мукаммал бўлади. Бугун биз шунга жуда яқин келдик», — деди Куман.
Куман, шунингдек, дубл муаллифи Брайан Бробби сон орқа мушагида ноқулайлик ҳис қилганини ва унинг кейинги ўйиндаги иштироки ҳозирча номаълум эканини маълум қилди.
Мемфис Депай ҳақида эса мураббий қуйидагича фикр билдирди:
«Яқин орада Мемфис асосий таркибда майдонга тушадиган вақт келиши мумкин. Бироқ бу бошқа футболчиларнинг қандай ўйнашига ҳам боғлиқ. У жамоа учун жуда муҳим футболчи ва шерикларига ижобий таъсир кўрсатади. Ҳозирча у ўз ролини қабул қилган. Аммо бу қанча давом этишини билмайман.»
Эслатиб ўтамиз, Нидерландия 2-турда Швецияни 5:1 ҳисобида мағлуб этди ва 4 очко билан F гуруҳи пешқадамига айланди. Швеция ҳисобида 3 очко мавжуд. Япония 1 очко билан учинчи, Тунис эса очкосиз сўнгги ўринда бормоқда.
