Нидерландия сардори Виржил ван Дейк Швеция устидан қозонилган 5:1 ҳисобидаги ғалабадан сўнг жароҳати ҳақида гапирди.
«Ливерпул» ҳимоячиси ўйин давомида кучли зарба қабул қилганини ва бир муддат оёғини ҳис қилмай қолганини маълум қилди.
«Сон қисмимга кучли зарба тегди ва оёғимни умуман ҳис қилмай қолдим. Ростини айтсам, бу бироз қўрқинчли ҳолат эди. Аммо, эҳтимол, асаб томирлари сиқилиб қолган бўлса керак», — деди Ван Дейк NOS телеканалига.
Шунга қарамай, футболчи жароҳат жиддий эмаслигига ишонмоқда.
«Менимча, вазият унчалик оғир эмас. Тез орада ҳаммаси аниқ бўлади», — дея қўшимча қилди у.
Қайд этилишича, Тунисга қарши навбатдаги учрашувда майдонга тушса, Ван Дейк Нидерландия миллий жамоаси тарихида жаҳон чемпионатларида энг кўп ўйин ўтказган сардорга айланади.
Айни пайтда у бу кўрсаткич бўйича Йохан Кройфф, Жованни ван Бронкхорст, Франк де Бур ва Руд Крол билан биргаликда 7 та ўйин натижаси билан рекордни бўлишиб турибди.
Нидерландия лагеридаги муаммолар фақат Ван Дейк билан чекланиб қолмади. Яримҳимоячи Френки де Йонг ҳам ўйин олдидан жароҳат билан боғлиқ муаммога дуч келганини айтди.
«Машғулот вақтида тўқнашув бўлганди ва мен ҳам ўша вазиятда иштирок этганман. Натижада кичик жароҳат олгандим, аммо охир-оқибат майдонга тушишга муваффақ бўлдим.
Ўйин давомида оғриқни ҳис қилдим, лекин бунга чидаш мумкин эди. Энди организмнинг реакциясини кузатамиз, бироқ мен тикланишимга ишонаман», — деди Де Йонг.
Эслатиб ўтамиз, Нидерландия ЖЧ-2026 гуруҳ босқичининг 2-турида Швецияни 5:1 ҳисобида мағлуб этиб, F гуруҳи пешқадамига айланди.
