Суперлиганинг 24-тури якунланди. Тошкентда «Локомотив» «Насаф»ни қабул қилди. Ўйинда эса ҳисоб очилмади – 0:0.
Учрашувдан сўнг мезбонлар бош мураббийи Мирко Еличич матбуот анжуманида қатнашди.
- Ўйин биз кутганимиздек кечди. Юқори кайфият, агрессив ва ҳужумкор футбол гувоҳи бўлдик. Томошабоп учрашув бўлди. «Насаф»ни яхши биламиз, уларнинг майдонда қандай ҳаракат қилишини, ўз ўйин услуби ва маданияти борлигини биламиз. Ўзбекистонда эканимдан буён уларнинг даражаси пасаймаётганини, доимо юқори савияни сақлаб келаётганини кўриб турибман. Бунинг учун уларни алоҳида эътироф этиш керак.
- «Насаф»нинг бугунги ўйинини қандай баҳолайсиз? Жамоангиз ҳаракатларидан қанчалик қониқдингиз?
- Ҳозирги вақтда «Насаф» яхши формада. Сўнгги бир ярим ой давомида жуда яхши ўйин намойиш этмоқда. Ўз жамоам ҳақида гапирадиган бўлсам, айрим жиҳатларда янада кучайишимиз кераклигини ҳис қилдим. Аммо умумий ўйиндан, футболчиларнинг майдонда ўзларини қандай кўрсатганидан қониқдим.
Ишлашда давом этамиз. Бизга етишмаётган жиҳатлар устида ишлаш ҳеч қачон тугамайди. Доимо ниманидир яхшилашга ҳаракат қиламиз.
Бугун қарши ҳужумлар учун кўп имкониятлар бўлди, лекин улардан фойдалана олмадик. Айниқса, якуний босқичда тўғри қарор қабул қилишда камчиликлар бўлди.
- «Насаф» уч кун олдин Осиё Чемпионлар лигасида ўйнади ва бугунги учрашувда жисмоний жиҳатдан кўпроқ куч сарфлашига тўғри келди. «Локомотив» эса анча олдинроқ ўйнаган эди. Шунга қарамай, баҳс тенг кечди. «Насаф»нинг чарчоғи сабаб ўйин соддароқ кўринди, деб ҳисоблаш мумкинми? «Локомотив» бугун асосан дуранг учун ҳаракат қилдими?
- Агар уч кундан кейинги ўйинда чарчоқ сезилса, демак, клубда нимадир нотўғри йўлга қўйилган. Уч кунлик тикланиш вақти — энг мақбул муддатлардан бири.
Мен учун жамоам бутун мавсум давомида ҳар уч кунда ўйнаса ҳам яхши бўларди.
Бу футболчиларнинг жисмоний ҳолатини яхшилашга ёрдам беради ва тикланиш учун ҳам вақт етарли бўлади. Йил давомида 60–70 та ўйин ўтказиш мумкин. Бизда бундай тақвим йўқ. Шунинг учун ҳар уч кунда ўйнаш мен учун муаммо эмас, аксинча, яхши ҳолат бўларди. Бугунги учрашувда дуранг учун ўйнадик, деб айтмаган бўлардим.
- Бугунги ўйинда тўрт нафар ҳимоячи билан ҳаракат қилдингиз, айрим пайтларда эса беш нафар ҳимоячи билан ўйнадингиз. Бу тактик режа эдими?
- Аслида, «Насаф» бизнинг майдонга келганда беш нафар ҳимоячи билан ўйнайди, деб ўйлагандик. Аммо ўйинни бошлаганида бундай бўлмади. Шундан кейин биз ҳам тактикамизни ўзгартиришимиз керак эди.
Яна бир ҳужумчини майдонга туширишга ҳаракат қилдик. Аммо комиссардан сўраганимда, у бунинг учун кеч бўлганини айтди. Қоидага кўра, футболчини алмаштириш мумкин, лекин бундай ҳолатда алмаштирилган футболчи кейин яна ўйинга қайта олмас экан.
Шу сабабли ўйинни дастлаб режалаштирганимиздек бошлай олмадик. Рақибнинг ҳаракатларига қараб, айрим вазиятларда импровизация қилишимизга тўғри келди.
- Мавсум бошидан буён «Локомотив»нинг асосий мақсади ёш футболчиларнинг савиясини ошириш, уларни тажрибали ўйинчилар билан бирга тарбиялаш эканини таъкидлаб келяпсиз. Аммо мавсум якунига яқинлашмоқда. Ҳозир жамоанинг кучли бешлик ёки тўртликка кириш имконияти ҳам бор…
- Мен турнир жадвалига унчалик қарамайман. Кўп мамлакатларда клублар фаолиятига қарасангиз, уларнинг асосий эътибори футболчиларни ривожлантириш ва жамоанинг ўйин фалсафасини шакллантиришга қаратилади.
Мени энг қувонтирадиган жиҳат — Ўзбекистонда жуда яхши футболчилар бор. Менимча, Осиёдаги энг иқтидорли ёш футболчилар айнан шу ерда. Албатта, Европани ҳисобга олмасак, Осиёдаги энг яхши иқтидорлардан бири шу мамлакатда эканига ишонаман.
Биз клубнинг фалсафаси ва шароитларидан келиб чиқиб, мамлакат футболига қандай ҳисса қўша олишимизни излаймиз. Бутун мамлакат миқёсида ишлашга ҳаракат қиламиз. Лекин ҳар доим ҳамма нарса биз хоҳлагандек бўлаётганини ҳис қилмаймиз. Доимо янада яхшилаш керак бўлган жиҳатлар топилади.
Мураббий учун энг ёқимли жараён — футболчиларни муайян услубда футбол ўйнашга ўргатиш. Агар улар сиз берган кўрсатмаларни ўзлаштириб, майдонда қўллай олса, бу катта ютуқ. Сиз ишлайсиз, тушунтирасиз, аммо футболчилар буни бажара олмаса, бу жуда қийин жараёнга айланади. Бундай ҳолатда оддийроқ футбол ўйнашга мажбур бўласиз.
«Локомотив»да эса ўйин сифати устида ишлаш, турли тактик тажрибаларни амалга ошириш имконияти бор. Бу мен учун жуда муҳим», - дея Еличичнинг сўзларини келтиради Tribuna.uz журналисти.
