Наманган бўлиб ўтган «Навбаҳор» - «Пахтакор» (1:1) беллашувидан сўнг наманганликлар ёрдамчи мураббийи Михаил Еремчук матбуот анжуманида фикрларини айтиб ўтди.
- Аввало, мухлисларга миннатдорчилик билдирмоқчиман. Бугун стадионда ажойиб муҳит ҳукм сурди. Бу футболчиларимизга олдинга интилишда катта ёрдам берди.
Афсуски, бундай ўйинларда ҳар бир хатонинг нархи жуда қимматга тушади. Биринчи бўлиб хатога йўл қўйган ҳам биз бўлдик. Аммо йигитларга тан бериш керак. Уларга охиригача ҳаракат қилгани, сўнгги дақиқаларга қадар ҳимоялангани учун катта раҳмат айтаман.
Бугун ғалаба қозонишни жуда хоҳлагандик. Учрашувнинг якуний қисмидаги ҳаракатларимиз ҳам буни тасдиқлайди. Гол уриш учун бор кучимиз билан рақиб дарвозаси томон интилдик. Афсуски, бунинг уддасидан чиқа олмадик. Футбол шунақа.
Сўнгги ўйинларда пенальтиларни амалга оширишда нимадир ўхшамаётгани ҳам бор гап. Ваҳоланки, машғулотларда йигитлар пенальтиларни яхши тепишади. Бу жиҳат устида ишлашда давом этамиз.
Стандарт вазиятларга келсак, бугун ҳам стандартдан гол урдик. ОКМКга қарши учрашувда ҳам стандарт вазиятдан гол киритгандик. Бу компонент устида ишлаяпмиз. Аммо рақиблар ҳам яхши ҳимояланишяпти, бизни ўрганишяпти.
Футболнинг ҳар бир жиҳатида ўсишимиз керак. Ҳар бир компонент устида ишлаяпмиз, лекин афсуски, ҳамма нарса ҳам доим биз истагандек бўлавермайди. Ҳатто кучли жамоаларда ҳам шундай ҳолатлар кузатилади. Биз ҳам бундан мустасно эмасмиз. Аммо бу борада янада кучаямиз.
Бугун мухлисларни ғалаба билан хурсанд қилиш учун имкониятларимиз етарли эди. Яна бир бор таъкидлайман, биз ғалаба учун бор кучимизни сарфладик ва буни жуда хоҳлагандик. Афсуски, натижа шундай бўлди.
Юсуповга келсак, у ўз савияси юқори бўлган профессионал дарвозабон. Жаҳон чемпионатига йўл олган миллий терма жамоамиз сафидаги ўйинлари ҳам буни тасдиқлайди. Ҳар бир футболчида, ҳар бир дарвозабонда ҳам шундай даврлар бўлиши мумкин. Бугунги гол учун уни айблаш адолатдан бўлмайди. У ўтказиб юборган голни фақат унинг хатоси билан боғлаш нотўғри. Бу бир нечта хатоларнинг натижаси. Гол ўтказиб юборишимизга сабаб бўлган вазият анча олдин бошланган. Нега бундай ўйнадик, нима учун вазият шу тарзда ривожланди — асосий сабабларни шу ердан излаш керак.
Кейинги ўйинларда вазият бошқача бўлиши мумкин. Аммо биз Ўткирга ишонамиз ва унга нисбатан шубҳамиз йўқ.
- Бугунги ўйиндан кейин чемпионлик пойгаси тугади, деб ҳисоблаш мумкинми?
- Ҳали ўйинлар бор, ҳаммаси ўзгариши мумкин. Доимо ишониш ва ҳар бир учрашувда ғалаба қозонишга интилиш керак. Мухлисларимизни хурсанд қилиш, ўйинимиз билан уларга завқ бағишлаш учун қўлимиздан келган барча ишни қиламиз. Бунинг учун бор кучимизни ишга соламиз ва натижага эришиш йўлида боримизни берамиз.
- Норчаев ва Кожо жуфтлиги асосий таркибда майдонга тушиши мумкинми? Шунингдек, Фернандес билан боғлиқ вазиятга изоҳ берсангиз. Уни анчадан бери майдонда кўрмаяпмиз. Муаммо нимада?
- Алекснинг тиззасидан жароҳати бор, унга операция қилинди. Ҳозир тикланиш жараёнини бошлайди. Умид қиламанки, тикланиш жараёни яхши ва тез кечади. Уни яна майдонда кўрамиз, деган умиддаман.
Норчаев ва Кожо жуфтлигига келсак, бу вариантни қўллаш мумкин. Бугун ҳам, аввалги ўйинда ҳам гол ура оладиган футболчилар — Норчаев ва Абдураҳмоновдан фойдаландик. Шундай комбинацияни синаб кўрдик. Шунинг учун бундай жуфтликни ҳам кўришимиз мумкин.
Ҳаммаси футболчиларнинг тайёргарлик даражасига боғлиқ. Биз таркибни танлашда уларнинг қай даражада тайёр экани, машғулотларда қандай ҳаракат қилаётгани ва ўзини қандай кўрсатаётганига эътибор қаратамиз. Шунингдек, рақибнинг ўйинидан келиб чиқиб, асосий тактик режамиз ва ўйинни кучайтириш учун қўшимча режамиз ҳам бўлади.
- Пеналти тепиш олдидан тўпни бошқа футболчининг олиши ҳам ўзига хос усулга айланган. Бу нима учун қилинади?
- Дарвозабонлар пеналти тепувчи футболчига руҳий босим ўтказишга ҳаракат қилаётганини кўряпмиз. Шунинг учун йигитларимиздан бири тўпни атайлаб олади, гўё пеналтини ўзи тепмоқчидек ҳаракат қилади. Кейин дарвозабон ўз жойини эгаллагач, аслида пенальти тепадиган футболчи хотиржам ҳолда тўпни олиб, зарба беради.
- Жамоада пенальти тепиш бўйича асосий масъул футболчи борми?
- Ҳа, жамоада пеналти тепувчи асосий футболчи бор. Умуман олганда, бизда пенальтини амалга ошира оладиган уч-тўрт нафар футболчи мавжуд. Ким зарба беришини ўйин давомидаги ҳолат, футболчининг ўзига бўлган ишончи ва руҳий ҳолатидан келиб чиқиб белгилаймиз.
- Пеналтидан гол уриш бўйича аниқ башоратингиз борми?
- Машғулотлар якунида пенальтиларни тепиб кўрамиз. Ҳатто дарвозабонлар ҳам бир-бирига пеналти тепишади. Шу сабабли футболда ҳеч нарсани олдиндан истисно қилиб бўлмайди.
- Кападзе нечта ўйинга дисквалификация қилинган?
- Адашмасам, бир ўйинга. Демак, у Ўзбекистон Кубогидаги учрашувда майдонга тушиши керак.
- Шоҳрух Абдураҳмоновнинг жароҳати қанчалик жиддий?
- Унинг сон орқа қисмида жароҳат бор. Жароҳатнинг қай даражада жиддий эканини аниқлаш учун МРТ текширувидан ўтказиш керак. Унга тезроқ соғайиб кетишини тилаймиз. Кейинги ўйинларда жамоамизга ёрдам бера олади, деган умиддамиз.
- Ўзбекистон Кубогидаги имкониятларингизга қандай баҳо берасиз? Кубокни қўлга киритишга ишонасизми?
- Биз ҳаммамиз бунга умид қиламиз. Бу кўп жиҳатдан ўзимизга боғлиқ. Ҳаракат қиляпмиз, бунинг учун қўлимиздан келган барча ишни қиляпмиз.
Аммо, афсуски, футболда хатолар бўлади ва бўлаверади. Улардан қочиб қутулиб бўлмайди. Ҳатто кундалик ҳаётимизда ҳам хатога йўл қўямиз. Сиз ҳам, биз ҳам турли вазиятларда адашишимиз мумкин.
Бизнинг олдимиздаги вазифалар эса ўзгармайди — ҳар бир ўйинда ғалаба қозониш ва мухлисларни хурсанд қилиш. Чунки уларнинг бизга бўлган қўллаб-қувватлаши жуда катта. Бугун ҳам уларни хурсанд қилишни жуда хоҳлагандик», - дея Еремчукнинг сўзларини келтиради Tribuna.uz мухбири.
