Осиё Чемпионлар лигаси-2 мусобақаси доирасида иккинчи тур учрашуви — «Насаф» ва «Ал Ваҳда» (1:2) жамоалари ўртасидаги баҳсдан кейин матбуот анжуманида меҳмон жамоа бош мураббийи Раймундо Чамуска ва учрашувнинг энг яхши футболчиси Факундо Даниэл иштирок этишди.
«Ал Ваҳда» бош мураббийи: Ҳа, бу жуда қийин ўйин бўлди. Учрашувдан олдин рақибга ҳурмат билан ёндашдик. Биз рақибни яхши билардик ва бир ҳафта давомида унинг ўйинини таҳлил қилдик.
Ўйинни устунлик билан бошлаган бўлсак-да, иккинчи бўлимда ушбу уч очкони сақлаб қолиш осон бўлмади. Аммо футболчиларимизнинг руҳияти, жамоамизнинг ва футболчиларимизнинг тезлиги уч очкони қўлга киритишимизда муҳим роль ўйнади. Жамоамизнинг бугунги ўйинидан жуда хурсандман. Биз мақсадимизга эришдик.
- Факундо, сизга савол: бугунги ўз ўйинингиз ва жамоа ҳаракатлари ҳақида нима дея оласиз?
Факундо Даниэль: Албатта, жуда хурсандман. Энг аввало, жамоамиз учун хурсандман. Чунки уч очкони қўлга киритдик. Кучли жамоага, маҳоратли футболчиларга ва кучли мураббийга қарши уч очкони қўлга киритганимиздан мамнунмиз. Бугун жамоамиз жуда яхши ўйнади. Кучли рақибга қарши баҳсда ғалаба қозониб, уч очкони қўлга киритганимиздан бахтиёрмиз.
- «Ал Ваҳда»нинг гуруҳдаги мақсади қандай?
«Ал Ваҳда» бош мураббийи: Дастлаб гуруҳ босқичидан муваффақиятли ўтишимиз керак. Кейин эса финалга чиқишни мақсад қилганмиз. Биз финалга йўл олишимиз керак ва асосий ниятимиз — мусобақа ғолиблиги учун курашиш.
Ўзим ҳақимда ҳам бир нарсани айтиб ўтмоқчиман. Аввалги мавсумларда Осиё Чемпионлар лигаси-2 мусобақасида иштирок этиш ҳуқуқини икки марта қўлга киритганман. Лекин кейинги мавсумларда бошқа жамоаларда ишлаганим сабабли ушбу мусобақада иштирок эта олмаганман. Энди эса яна бу мусобақада қатнашиш имкониятига эгаман.
Бу мен учун ушбу мусобақадаги биринчи иштирок эмас. Шунинг учун янада узоқроққа боришга ҳаракат қиламиз.
- Футболчига саволим бор эди. Жамоада юқори маҳоратга эга футболчилар жамланган бўлса-да, улар ўз имкониятларини тўлиқ намойиш эта олишмаяптими? Менимча, бугун бундан ҳам яхшироқ ўйин кўрсатиш мумкин эди.
Факундо Даниэл: Ҳа, жамоамизда индивидуал маҳоратга эга футболчилар кўп. Менинг фикримча, жамоа янада яхшироқ ўйнаши мумкин. Бунинг учун доимо меҳнат қилишимиз, ўз устимизда ишлашимиз керак.
- Жамоа кўпроқ ҳимоявий ўйин намойиш қилдими ёки шунга мажбур бўлдими?
«Ал Ваҳда» бош мураббийи: Ростини айтсам, ўйин бошида рақибнинг кучли прессинги бизга қийинчилик туғдирди. Улар юқорида босим ўтказиб, жамоамизни мураккаб вазиятга солиб қўйишди. Бироқ 15 дақиқадан кейин футболчиларим ўйинни назорат қила бошлашди. Тўпни ушлаб туришга, ўз услубимизда ўйнашга ва яхши комбинациялар ташкил этишга эришдик.
Аммо иккинчи бўлимнинг сўнгги қисмида яна битта ҳимоячини майдонга туширишимга тўғри келди. Чунки «Насаф» зарба бериш маҳорати юқори бўлган кўплаб футболчиларга эга жамоа. Бу оддий ҳолат эмас. Улар қанотлардан олдинга ўтишганда, жарима майдони олдида кўплаб футболчилар тўпланишади ва зарба бериш учун қулай вазият яратишади. Бундай пайтда улар жуда хавфли.
Шунинг учун ҳимояни мустаҳкамлашим керак эди. Ўйиннинг сўнгги дақиқаларида баъзан 5-4-1 тактик схемасидан фойдаланаман. Буни асосан учрашув якунида натижани сақлаб қолиш учун қўллайман.
- «Насаф»дан натижа олиш учун ҳимоявий ўйин кўрсатиш осонроқми ёки ҳужумкор футбол орқали уч очкони қўлга киритишми?
«Ал Ваҳда» бош мураббийи: Аслида, биз доимо ҳужумкор ўйинга таянамиз. Тактикамиз ҳам кўпроқ ҳужум қилишга қаратилган. Лекин бугунги ўйин ҳақида гапирадиган бўлсам, биз рақибнинг қандай тактика танлашини бошқача тасаввур қилгандик. «Насаф» беш нафар ҳимоячи билан ўйнайди, деб кутгандик. Аммо бугун улар тўрт нафар ҳимоячи билан ҳаракат қилишди ва кўпроқ олдинга интилишди. Бу эса бизга қийинчилик туғдирди.
Биз ўз ўйинимизни намойиш этишга ҳаракат қиламиз. «Насаф» бугун бошқача тактик схема танлаши биз учун кутилмаган ҳолат бўлди. Биз улардан бошқа тактик ёндашувни кутгандик.
Умуман олганда, агар ҳимоя, ярим ҳимоя ва ҳужум ўртасидаги мувозанатни сақлай олсак, ҳар қандай жамоага, жумладан, «Насаф»га қарши ҳам яхши ўйин кўрсатишимиз мумкин», - дея «Ал Вахда» бош мураббийининг сўзларини келтиради Tribuna.uz мухбири.
