Жамшид Саидов: «Бундай муҳитда ўйнаш исталган жамоага қийин»

Суперлиганинг 24-туридан ўрин олган «Андижон» ва «Қизилқум» (0:1) жамоалари ўртасидаги ўйиндан кейин меҳмонлар бош мураббийи Жамшид Саидов матбуот анжуманида қатнашди.

- Аввало, бугунги ўйин ҳақида нима дейиш мумкин? Биз учрашув жуда қийин кечишини билгандик. Айниқса, 12-ўйинчиси - минглаб мухлисларнинг қўллаб-қувватлаши остида ҳар қандай жамоа олдинга интилади. Бундай муҳитда ўйнаш исталган жамоага қийин. Биз бунга тайёргарлик кўргандик.

Бугун ғалаба қозонганимиздан хурсандман. Футболчиларга майдондаги фидойилиги учун раҳмат айтмоқчиман. Улар ўзларидан талаб қилинган вазифани бажаришди.

Минг километрдан ортиқ масофани босиб келган мухлисларимизга ҳам миннатдорчилик билдираман. «Андижон» жамоасига эса кейинги ўйинларда омад тилайман.

— Жамшид ака, Самандар Шукруллаевнинг майдонга туширилиши, яъни, беш нафар ҳимоячи билан ўйнашингиз ҳисобни сақлаб қолиш учун қилинган ўзгаришмиди?

- Ҳа. Ўзингиз кўрдингиз, футболчиларимиз бироз чарчаб қолишди, «Андижон» эса босимни кучайтира бошлади. Шунинг учун ҳимояда беш нафар футболчи билан ўйнашга ўтдик.

— Захирадан майдонга тушганлар ўйинни қанчалик кучайтира олишди? Масалан, андижонлик ярим ҳимоячи...

- Бизнинг захирадан тушган футболчимиз ҳам майдонга яхши киришди. Унга ҳужумдан кўра кўпроқ ҳимояда ҳаракат қилиш вазифаси юклатилган эди. Шу сабабли бу ўзгаришни амалга оширдик. Менимча, у ёмон ўйнамади, муваффақиятли ҳаракат қилди», - дея Саидовнинг сўзларини келтиради Tribuna.uz журналисти.