«Машъал» - ОКМК жамоалари ўртасидаги ўйиндан кейин меҳмонлар устози Миржалол Қосимов матбуот анжуманида қатнашди.
- Бугунги ўйинга келадиган бўлсак, осон ўйиннинг ўзи йўқ. Шунинг учун ҳам ҳозир FIFA кунларидан кейин ўйинлар тез-тез ўтказиляпти, қисқа муддат ичида майдонга тушишимизга тўғри келяпти.
«Навбаҳор»га қарши ўйинда ҳам кўп куч йўқотгандик, йигитлар жуда кўп ҳаракат қилишди. Яна тўрт кундан кейин ўйинимиз борлигини ҳам ҳисобга олиб, ротация амалга оширилди ва бошқа футболчиларга ҳам имконият берилди. Улар ёмон кўринишгани йўқ.
Албатта, осон ўйиннинг ўзи йўқ. «Машъал» жамоаси ҳам бор кучи ва маҳоратини намойиш этишга ҳаракат қилди. Лекин ўз имкониятларимиздан фойдаланиб, якунда 1:0 ҳисобида ғалаба қозондик ва уч очкога эга бўлдик.
- Захирадан майдонга тушган футболчилар ҳақида...
- Ротация қилдим, деб айтяпман-ку. Улар учрашувни биринчи бўлим бошиданоқ асосий таркибда бошлашлари ҳам мумкин эди. Абдураззоқов, бу ёқда Асад, Сиёваш, Аҳмад... «Навбаҳор»га қарши ўйинда кўп куч йўқотишган эди. Шунинг учун ротация қилишга қарор қилдим ва бу ўз самарасини берди, барибир фойдаси тегди.
- Биринчи даврада ўз майдонингизда 2:1 ҳисобида ғалаба қозонган эдингиз. Бугун эса ўзингиз таъкидлаганингиздек, ўйинлар қисқа вақт оралиғида ўтказилмоқда ва тикланиш учун вақт керак. Қийинчилик билан бўлса-да, 1:0 ҳисобида ғалаба қозондингиз. Бугунги учрашув натижаси кейинги рақибларга қарши тайёргарлик кўришда ҳам сизга қандайдир фойда бердими? Чунки Суперлигада осон ўйиннинг ўзи қолмаяпти.
- Сизни тушундим. Албатта, ҳар бир ўйинга алоҳида тайёргарлик кўрилади. Шу боисдан ҳам қўл остимиздаги футболчилар жамоага ўз ҳиссасини қўшиши керак. Битта таркиб билан йил охиригача ўйнаб бўлмайди. Шу сабабли ҳам ротация амалга оширилди. Албатта, бу ўз самарасини беради ва келгусида асқотади.
- «Машъал» сўнгги турларда ёш футболчиларга имконият беряпти. Сиз эса тажрибали мураббийсиз, кўп йиллардан буён футбол ичидасиз. Ўзингиз ҳам футболимиз афсонасига айлангансиз, машҳур ўйинларингиз билан мухлислар ёдида қолгансиз. Ҳам футболчи, ҳам мураббий сифатида айтинг-чи, ёшларга имконият бераётган «Машъал» ҳозир тўғри йўлдан кетяптими? Бугунги ва мавсумдаги вазиятдан келиб чиқиб, бу қарорни қандай баҳолайсиз?
- Тўғрисини айтсам, мен ҳеч қачон... Мен энг ёмон кўрадиган нарса —ташқаридан туриб унга баҳо бериш, ичига кирмасдан туриб қандайдир фикр билдириш нотўғри. Аммо ёшларга имконият берилаётганидан келиб чиқиб айтадиган бўлсам, менимча, уларда келаси йил учун аниқ вазифалар аллақачон белгилаб қўйилган. Шу вазифаларга қараб ҳаракат қилишяпти. Яъни, ёшларга имконият бериб, тақдирга тан бериб келаси йилга тайёргарлик кўришяпти, деб айтишим мумкин. Бошқа ҳеч нима дея олмайман, албатта одам тилайман», - дея Миржалол Қўшоқовичнинг сўзларини келтиради Tribuna.uz журналисти.
