ОКМК клуби ўз майдонида «Навбаҳор»га қарши майдонга тушди. Қизиқарли ва курашларга бой ўтган учрашув 2:2 ҳисобида якунланди. Беллашувдан сўнг олмалиқликлар бош мураббийи Миржалол Қосимов матбуот анжуманида иштирок этди.
- Ҳамма кутган ўйин эди. Ҳамиша «Навбаҳор» жамоаси билан қизиқарли ўйин бўлиб келган. Албатта, мухлисларга ёқди, деб ўйлайман. Тезкор, курашларга бой ўйин бўлди. Лекин охир-оқибат 2:2 ўйнадик. Бу тарихга айланди, энди кейинги учрашувга тайёргарлик кўришимиз керак. Йил охири яқинлашяпти, чемпионат тугашига оз қоляпти. Бунақа интригалар кўп бўлади.
- Бугунги учрашувдан қониққан ва қониқмаган томонларингиз борасида фикрларингизни билдирсангиз.
- Қониққаним, йигитлар охиригача бор кучини бериб, ҳар бир эпизодда курашишиб, яхши тарафларини кўрсатишга ҳаракат қилишди. Мақсадимиз мухлисларни хурсанд қилиш эди. Қониқмаганим тўлақонлик уч очкога эга бўлмаганимиз.
- Аброр Каримов икки марта жамоаси дарвозасига пеналти белгиланишига сабаб бўлди…
- Қонун ҳаммага бир хил. У ёш, мана шундай ўйинлар орқали тобланади ҳам, кучаяди ҳам. Биринчи пеналтидан Асад ҳамма нарсага чек қўйиши керак эди. Биргина нотўғри ҳаракати охир-оқибат пенальтига олиб келди. Лекин шу пайтда ҳам дарвоза томон йўналтирилмаганди, у ерда Аброр тегиши керак эмасди. Параллел равишда яқинроқ ўйнаши керак эди. Мана шундай ҳолатлардан тажриба тўплайди, тўғри хулоса чиқариш керак. Агар кейин учрашув ҳам худди шундай қилса ундай бошқача...Бир пайтлар айтишарди, яхши ҳимоячи бир марта ўзини алдашга беради, бошқа бермайди.
- Вазиятларлан фойдаланиш яхши бўлди. Сиз ҳам олдин зўр-зўр футболчилар билан ўйнагансиз. Вазиятлардан фойдаланиш устида наҳот яна ишланмаса…
- Унда ҳар куни машғулотга сизлар ҳам қатнанглар. Ҳар доим буни устида ишлаймиз. Дарвозага гол урилганида қилган меҳнатинг рўёбга чиқади. Вазиятга очко берилмайди. Дарвоза олдида ишлаш, тўп билан муомала, ҳаммасини айтамиз. Аммо панд беряпти. Бугун ҳам голлар урдик, ўтган ўйинда ҳам биринчи бўлимни ўзида иккита имкониятимиз бор эди. Стандартдан гол ўтказдик, бу қийин вазият эмасди. Диққатни йўқотмаслик керак эди. Сен ўша ўйинчига масъулмидинг? Доим ўйин олдидан кўрсатмада кимга қарши ўйнаши ҳам айтилади. Сен ишингни аъло даражада бажариб қўй, жамоадошинг эса вазиятдан келиб чиқиб келишиб олади. Стандартларда тўпга анқайиб қолади ва кўпинча бу панд бериб қўяди. Жиззахда ҳам худди шунақа бўлганди.
Яна августга қайтамиз. «Насаф», «Динамо» каби учрашувларда яхши натижа қайд этишимиз керак эди, Бухорода ҳам. Агарда яратилган имкониятлардан тўлиқ фойдаланганимизда биз чемпион бўлардик», - дея Миржалол Қосимовнинг сўзларини келтиради Tribuna.uz мухбири.
