«Манчестер Юнайтед» раҳбарияти жамоа бош мураббийи Майкл Кэррикни истеъфога чиқариш имкониятини кўриб чиқмоқда. Бу ҳақда Football Insider хабар берди.
Маълум қилинишича, манчестерликлар Кэррик ўрнига «Наполи»дан кетганидан сўнг ишсиз юрган Антонио Контени тайинлаш вариантини ўрганмоқда. Италиялик мутахассис мураббийлик фаолиятига қайтиш истагида ва «Манчестер Юнайтед»дан таклиф тушса, уни кўриб чиқишга тайёр.
Маълумот ўрнида, Конте 2016–2018 йилларда «Челси»ни бошқариб, Англия чемпионати ва мамлакат кубогида чемпионликни қўлга киритган. Шунингдек, у 2021–2023 йилларда «Тоттенҳэм» бош мураббийи лавозимида ишлаган.
Ҳозирча «Манчестер Юнайтед» томонидан эҳтимолий мураббий алмашинуви юзасидан расмий маълумот берилмаган. Аввалроқ «қизил иблислар» мухлислари Аморимни қайтаришни талаб қилаётгани маълум қилинганди.
