Niderlandiya sardori Virjil van Deyk Shvetsiya ustidan qozonilgan 5:1 hisobidagi g‘alabadan so‘ng jarohati haqida gapirdi.
«Liverpul» himoyachisi o‘yin davomida kuchli zarba qabul qilganini va bir muddat oyog‘ini his qilmay qolganini ma’lum qildi.
«Son qismimga kuchli zarba tegdi va yuqori oyog‘imni umuman his qilmay qoldim. Rostini aytsam, bu biroz qo‘rqinchli holat edi. Ammo, ehtimol, asab tomirlari siqilib qolgan bo‘lsa kerak», — dedi Van Deyk NOS telekanaliga.
Shunga qaramay, futbolchi jarohat jiddiy emasligiga ishonmoqda.
«Menimcha, vaziyat unchalik og‘ir emas. Tez orada hammasi aniq bo‘ladi», — deya qo‘shimcha qildi u.
Qayd etilishicha, Tunisga qarshi navbatdagi uchrashuvda maydonga tushsa, Van Deyk Niderlandiya milliy jamoasi tarixida jahon chempionatlarida eng ko‘p o‘yin o‘tkazgan sardorga aylanadi.
Ayni paytda u bu ko‘rsatkich bo‘yicha Yoxan Kroyff, Jovanni van Bronkxorst, Frank de Bur va Rud Krol bilan birgalikda 7 ta o‘yin natijasi bilan rekordni bo‘lishib turibdi.
Niderlandiya lageridagi muammolar faqat Van Deyk bilan cheklanib qolmadi. Yarimhimoyachi Frenki de Yong ham o‘yin oldidan jarohat bilan bog‘liq muammoga duch kelganini aytdi.
«Mashg‘ulot vaqtida to‘qnashuv bo‘lgandi va men ham o‘sha vaziyatda ishtirok etganman. Natijada kichik jarohat olgandim, ammo oxir-oqibat maydonga tushishga muvaffaq bo‘ldim.
O‘yin davomida og‘riqni his qildim, lekin bunga chidash mumkin edi. Endi organizmning reaksiyasini kuzatamiz, biroq men tiklanishimga ishonaman», — dedi De Yong.
Eslatib o‘tamiz, Niderlandiya JCH-2026 guruh bosqichining 2-turida Shvetsiyani 5:1 hisobida mag‘lub etib, F guruhi peshqadamiga aylandi.
