Жанубий Африка Республикаси (ЖАР) миллий жамоаси футболчилари ЖЧ-2026 гуруҳ босқичининг 2-турида Чехияга қарши қайд этилган 1:1 ҳисобидаги дурангдан сўнг қимматбаҳо совғалар билан тақдирланди.
Ataque Futbolero хабарига кўра, футболчиларга умумий қиймати 50 минг АҚШ долларидан ортиқ бўлган заргарлик буюмлари совға қилинган.
Эслатиб ўтамиз, ЖАР мундиалдаги илк учрашувда Мексикага 0:2 ҳисобида мағлуб бўлган эди. Чехияга қарши қўлга киритилган бир очко эса жамоанинг плей-офф умидларини сақлаб қолди.
Гуруҳ босқичининг сўнгги турида Жанубий Африка Республикаси Жанубий Кореяга қарши майдонга тушади.
Мундиал гуруҳ босқичи 27 июнга қадар давом этади. Ҳар бир гуруҳдан дастлабки икки ўринни эгаллаган жамоалар ҳамда энг яхши саккизта учинчи ўрин соҳиблари плей-офф босқичига йўл олади.
