Англия миллий жамоаси яримҳимоячиси Жуд Беллингҳэм ЖЧ-2026даги иштироки ва жамоа сафида ўйнашнинг ўзи учун қанчалик муҳимлиги ҳақида гапирди.
«Реал» футболчисининг таъкидлашича, давлат мадҳияси янграйдиган лаҳзалар унинг учун энг ҳиссиётларга бой дақиқалардан бири ҳисобланади.
«Менимча, мадҳия куйланаётган пайт сени шу даражага етиб келишингга ёрдам берган инсонларни ва инглиз бўлиш нимани англатишини ҳис қиладиган сўнгги лаҳзадир», — деди Беллингҳэм.
Футболчи бундай дақиқаларда марҳум бобосини эслашини ҳам айтиб ўтди.
«Англия сафидаги дебютимдан бироз олдин вафот этган бобом ҳақида ўйлайман. У жуда ватанпарвар инсон эди. Шундай пайтларда албатта уни эслайман. Шунингдек, оилам ва мен шу ерга етиб келишим учун қилган барча қурбонликлари ҳақида ҳам ўйлайман», — деди у.
Беллингҳэм миллий жамоадаги роли ҳақида гапирар экан, жамоага ҳар қандай вазиятда фойда келтиришга тайёрлигини таъкидлади.
«Мен тўғри йўлдаман ва жамоага ёрдам бериш учун қўлимдан келган барча ишни қиламан. Асосий таркибда бўламанми ёки захирадан майдонга тушаманми — бунинг фарқи йўқ. Майдонга чиқиб, Англия футболкасини кийганимда бор кучимни бераман», — деди яримҳимоячи.
Эслатиб ўтамиз, Англия илк турдан сўнг ўз гуруҳида пешқадам бўлиб турибди.
