«Интер» «Ливерпул» яримҳимоячиси Куртис Жонсни ўз сафига қўшиб олишни истамоқда. Бироқ ушбу трансфер амалга ошиши учун бир нечта йирик битимлар рўй бериши керак.
Хабарларга кўра, жараён марказида «Ноттингҳэм Форест» футболчиси Эллиот Андерсон турибди. Ҳозирда ЖЧ-2026да Англия сафида ҳаракат қилаётган 23 ёшли яримҳимоячига «Манчестер Сити» жиддий қизиқиш билдирмоқда.
«Шаҳарликлар» футболчи учун 120 миллион фунт стерлинг таклиф қилган, бироқ «Форест» бу таклифни рад этган. Клуб рекорд даражадаги трансфер суммасини талаб қилмоқда.
Агар «Манчестер Сити» Андерсон трансферини якунласа, «Ноттингҳэм Форест» унинг ўрнига «Интер» яримҳимоячиси Давиде Фраттезини сотиб олишга ҳаракат қилади.
Милан клуби Фраттезини тахминан 30 миллион еврога баҳоламоқда. Айнан шу трансфер «Интер»га Куртис Жонс учун маблағ йиғиш имконини беради.
Италия гранди аввалроқ «Ливерпул»га 20 миллион евролик таклиф юборган, аммо мерсисайдликлар уни рад этган. Инглиз клуби футболчи учун камида 30 миллион евро талаб қилмоқда.
Шунингдек, «Ливерпул» Куртис Жонснинг эҳтимолий кейинги трансферидан фоиз олиш шартини ҳам келишувга киритмоқчи.
Манбаларга кўра, футболчининг ўзи Италияга кўчиб ўтиш ва Чемпионлар лигасида ўйнаш вариантига ижобий қарамоқда.
Шу тариқа, Куртис Жонснинг «Интер»га трансфери «Манчестер Сити» — Эллиот Андерсон ва «Ноттингҳэм Форест» — Давиде Фраттези битимларига бевосита боғлиқ бўлиб қолмоқда.
