«Ливерпул»нинг собиқ бош мураббийи Юрген Клопп Нидерландия миллий жамоаси сардори Виржил ван Дейкни ҳимоя қилиб, Рафаел ван дер Ваартнинг танқидларига муносабат билдирди.
Ҳаммаси Нидерландиянинг Япония билан 2:2 ҳисобидаги дурангидан кейин бошланди. NOS телеканали эксперти сифатида ишлаётган ван дер Ваарт Ван Дейкнинг ҳаракатларини кескин танқид қилганди.
«Ростини айтсам, Ван Дейкнинг ўйинидан ҳайратда қолдим. Айниқса бурилишларда жуда қийналаяпти. Худди Боэинг 747 самолёти бурилгандек таассурот қолдирди. Умид қиламанки, турнир давомида у тезроқ ҳаракатлана бошлайди», — деган эди собиқ футболчи.
Клопп эса бу фикрларни кескин рад этди.
«Рафаел ван дер Ваарт гапиришга арзийдими, бунга ҳам ишончим комил эмас. Агар у қачондир бирор футболчи ҳақида ижобий фикр билдирса, балки шундан кейин унинг гапларини жиддий қабул қиларман.
Унда бир нарсани кўриб, уни албатта чиройли ва кескин тарзда танқид қилиш одати бор. Гўёки ҳамма нарсага қарши чиқиши керакдек. Шундай экан, бундай гаплар унчалик муҳим эмас», — дея Клоппнинг сўзларини келтирди Goal нашри.
Эслатиб ўтамиз, 34 ёшли Виржил ван Дейк Клопп даврида «Ливерпул»нинг асосий етакчиларидан бири бўлган ва жамоа билан Англия Премер-лигаси ҳамда Чемпионлар лигаси ғолибига айланган. Ҳозирда у Роналд Куман бошқарувидаги Нидерландия миллий жамоаси сардори ҳисобланади.
