Аргентина миллий жамоаси бош мураббийи Лионел Скалони 2026 йилги жаҳон чемпионати финалидаги рақиби Испания миллий жамоаси ҳақида гапириб ўтди.
«Биз Испанияни аввал ҳам таҳлил қилганмиз, чунки улар билан март ойида ўйнашимиз керак эди. Декабр ойидан бошлаб эса жаҳон чемпионатидаги ҳар бир эҳтимолий рақибимизни ўргандик. Натижада Испанияни бошқа жамоаларга қараганда кўпроқ таҳлил қилганимиз йўқ.
Уларни яна бошдан таҳлил қилиш ҳам энг тўғри йўл эмас. Биз испанияликларнинг қандай ўйнашини яхши биламиз ва уларнинг кучли жиҳатлари ҳаммага маълум.
Биз уларнинг энг хавфли томонларини зарарсизлантиришга ҳаракат қиламиз. Шу билан бирга, ўз ўйинимизни ҳам рақибга сингдиришимиз ва айнан шу жамоага қарши самарали деб ҳисоблаган усуллардан фойдаланишимиз керак», — деди Скалони матбуот анжуманида.
Маълумот ўрнида, икки жамоа 19 июлдан 20 июлга ўтар кечаси жаҳон чемпионлиги учун ўзаро баҳс олиб боради. Учрашув Тошкент вақти билан соат 00:00 да бошланади.
Аргентина ушбу финалда ғалаба қозонса, тарихда тўртинчи марта жаҳон чемпионига айланади. Испания эса ўзининг иккинчи жаҳон чемпионлигини қўлга киритиш учун майдонга тушади.
Аввалроқ Скалони Месси қачон фаолиятини тугатиши ҳақида гапириб ўтганди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади