Англия футболчилари Тухелнинг Аргентина билан ўйиндаги ўзгартиришларидан ҳайратда қолишди

Англия миллий жамоаси футболчилари бош мураббий Томас Тухелнинг 2026 йилги Жаҳон чемпионати яримфиналидан ўрин олган Аргентинага (1:2) қарши ўйинда жамоа ҳисобда олдинга чиққандан кейин киритган ўзгаришларидан ҳайратда қолишган.

Немис мутахассиси Энтони Гордоннинг иккинчи бўлим ўртасида урган голидан сўнг майдонга уч нафар ҳимоячини туширди. Натижада Аргентина баҳс охирида иккита гол уриб, 2:1 ҳисобида ғалаба қозонди.

The Telegraph маълумотига кўра, Тухелнинг ҳимоявий алмаштиришлари Англиянинг айрим футболчиларини ҳайратга солган. Улар Гордоннинг голидан кейин Аргентина заиф ҳолатда қолгани ва тезкор футболчиларни майдонга тушириш орқали қарши ҳужумларда рақибни жазолаш мумкин деб ҳисоблашган. Бундай вариантлар қаторида Букайо Сака, Олли Уоткинс ва Нони Мадуэке бор эди, аммо улар захира ўриндиғида қолишди.

Шунингдек, кўпчилик Маркус Рэшфорд ва Айвен Тоунининг Аргентина ҳисобда олдинга чиққанидан 4 дақиқа ўтгачгина майдонга тушганидан ҳайратланишган.

Бундан ташқари, Тухел яримҳимоячи Деклан Райс ўрнига ҳимоячини эмас, балки бошқа яримҳимоячини тушириши керак эди, деган фикрлар ҳам бор. Энцо Фернандес айнан одатда Райс ёки бошқа таянч яримҳимоячиси назорат қиладиган ҳудуддан зарба бериб гол урди.

Жамоага яқин манба: «Ҳеч ким нима бўлаётганини тушуна олмади», — деган. Яна бир манба эса: «Тухел айнан плей-офф ўйинларида жамоани бошқара олиш қобилияти учун таклиф қилинганди, аммо бу сафар у хатога йўл қўйди», — деб айтган.

Таъкидланишича, мағлубиятга қарамай, Тухел Англия Футбол ассоциацияси ижрочи директори Марк Буллингҳэм томонидан қўллаб-қувватланишда давом этмоқда.