«Хоразм» клуби Ўзбекистон чемпионати юқори дивизионидаги 300-учрашувини ўтказди. Бу ҳақда ЎзПФЛ матбуот хизмати хабар берди.
Жамоа учун «Қизилқум»га қарши кечган баҳс тарихий аҳамият касб этди. Бу учрашув «Хоразм»нинг мамлакат чемпионати юқори дивизионидаги юбилей 300-ўйини сифатида тарихдан жой олди.
«Хоразм» шу пайтга қадар ўтказган 300 та учрашувида 74 марта ғалаба қозонган ва 56 та баҳсда дуранг қайд этган. Шунингдек, жамоа 170 та қарама-қаршиликда мағлубиятга учраган.
Клуб бу учрашувларда рақиблар дарвозасига жами 332 та гол урган. «Хоразм» дарвозасидан эса 589 та тўп ўтказиб юборилган. Шу тариқа, жамоанинг тўплар нисбати 332:589 кўринишида.
Маълумот ўрнида, «Қизилқум»га қарши учрашув (1:3) «Хоразм» тарихида Ўзбекистон чемпионати юқори дивизионидаги навбатдаги муҳим юбилей сифатида қайд этилди.
