Бугун Суперлигада 22-тур якунига етди. Турнинг сўнгги учрашуви Урганчда «Хоразм» ва «Қизилқум» жамоалари ўртасида бўлиб ўтди.
Қизиқарли ўтган беллашувда навоийликлар меҳмонда 3:1 ҳисобидаги жуда муҳим ғалабани қўлга киритди. Ўйиндан кейин «Қизилқум» бош мураббийи Жамшид Саидов матбуот анжуманида қуйидаги фикрларни айтди:
- Ўйин ҳақида нима дейиш мумкин? Бугун, албатта, ғалаба қозондик. Бундан жуда хурсандман. Уч очко, айтганларидек, олтинга тенг.
Йигитларга вазифа қўйилган эди ва улар бу вазифани бажаришди. Ўзларига юклатилган функция ва мажбуриятларни бажаришди, бу ўйиннинг аҳамиятини ҳам яхши тушунишди. Мен улардан хурсандман.
Яна бир бор йигитларга миннатдорчилик билдирмоқчиман, уларни ғалаба билан табриклайман. Шунча километр йўл босиб, бизга ёрдам бериш ва қўллаб-қувватлаш учун келган мухлисларга ҳам раҳмат айтмоқчиман. Барчани ушбу ғалаба билан табриклайман», - дея Саидовнинг сўзларини келтиради Tribuna.uz мухбири.
