Ўзбекистон миллий жамоаси ҳимоячиси Рустам Ашурматов ЖЧ-2026 1-туридан ўрин олган Колумбия (1:3) билан ўйиндан сўнг ЎФА матбуот хизматининг бир қатор саволларига жавоб берди.
— Жаҳон чемпионатидаги дебют ўйин ва жамоанинг илк голи ҳақида?
— Жаҳон чемпионатига чиққанимиз — фахр. Жуда бошқача туйғу. Илк ўйиндаёқ гол урганимиз эса қўшимча бахт, қувонч. Бу ўйинда ғалаба қозонишимиз ҳам мумкин эди, бироқ бироз омад етишмади. Кейинги ўйинларда фақат ғалаба учун майдонга тушамиз.
Голга келадиган бўлсак, бу — катта эмоция. Буни сўз билан таърифлаб бўлмайди.
— Олдинда Португалияга қарши баҳс кутмоқда. Жамоа қанчалик тайёр?
— Кундан кунга тикландик. Бугундан айнан Португалияга қарши тайёргарликни бошладик. Тактик ва жисмоний жиҳатдан яхшиланяпмиз. Максимум боримизни берамиз. 100% эмас, 1000% ҳаракат қиламиз.
— Энди бироз ортга қайтамиз. 2009 йили Роналду Тошкентга келганди. Ўша кун ҳақида нималарни эслайсиз?
— Ўшанда 13 ёш бўлганмиз. Унинг Тошкентга келиши кутилмаган ҳолат бўлган. Биз билан футбол ўйнаган, суратларга тушган. Бир кун келиб, мундиалда Роналдуга қарши ўйнашимиз тасаввуримизга сиғмаган. Бу — тарих. Лекин олдиндаги ўйинда нафақат Роналду, бутун Португалия миллий жамоасига қарши жанг қиламиз.
— Болаликдаги учрашувдан кейин ҳозиргача нималар ўзгарди?
— Жуда кўп нарса ўзгарди. Аввало, ёшимиз. Сўнг тажриба. Бир нечта халқаро ўйинларда ва турнирларда қатнашдик. Ҳозир Жаҳон чемпионатига келганмиз ва бутун халқ бизга қараб турибди. Ич-ичимизда ўша болалик бор, лекин майдонда унга қарши курашамиз.
— Энди майдонга рақиб сифатида тушиш қандай ҳис беради?
— Бу — нормал ҳолат. Биз Жаҳон чемпионатига чиқишни орзу қилганмиз. Ҳар қандай юлдузларга қарши ўйнашга мажбурмиз ва бунга тайёрмиз.
